الاحداث- كتبت جوزفين حبشي

انت لبناني
انت ما بحياتك كنت مستسلم.
انت بأيام الحرب، قاومت، حاربت، ناضلت، آمنت، عمّرت، تعلمت،  تثقفت، كبّرت، وسّعت، ضحكت، تجوزت، خططت،  خلّفت ولاد ومشاريع  وما تخلفت عن تحقيق احلام  وانجازات.
انت لبناني،
شو باك؟ مش لا بقلك تنهار.
ما في شي انتهى. هيدي أوقات بشعة، بس اكيد رح تخلص. هودي " ناس" (بين هلالين) بشعين، وسخين، فاسدين، فاجرين، ورح يخلصوا بيوم من الأيام. قد ما شدوا وأدوا وبطشوا وظلموا، رح يخلصوا بيوم من الأيام. هيدا فصل من كتاب، هيدي مش القصة كلها.
قوم، غسّل وجّك، حط الركوة عالنار، قول الله انت وعم تتسمّع على فيروز، تروّق منقوشة زعتر مع كم حبة زيتون ورشاد ونعنع وراس بندورة، سماع دعوة امك ، بوس ايد بيّك، شم ريحة ولادك، فتاح باب بيتك وطلاع عالضو، ضو النهار، مش ضو الكهربا. ما تبقى بالزاوية عم تندب حظك. حظك رائع، انت لبنااااااني، لبناني، لبناني. انت اللي كيف ما كبّوك بتجي واقف، انت اللي بتحكي كل اللغات، انت الذكي، الكريم، المثقف، الاجتماعي، العيّيش،  انت اللي زرعت العالم كلو ابداع بكل المجالات: فن وثقافة وعلم وطب وهندسة وجمال وتصاميم وازياء. انت حفيد فخر الدين والمير بشير ويوسف بك كرم، انت فيروز  وصباح  ووديع ونصري وفيلمون وماجدة والرحابنة وزكي ناصيف وعبد الرحمن الباشا، انت جبران خليل جبران ونعيّمة وامين معلوف والأخطل الصغير، انت 
عالم الفضاء بالناسا شارل العشي، انت جراح القلب الشهير مايكل دبغي
اللي قلو الرئيس نيكسون عند تكريمه بالبيت الأبيض: «أميركا مدينة لك، دعني أحضنك نيابة عن الملايين!».
انت فؤاد شهاب وكميل شمعون وبيار الجميل والباش بشير، انت البطريرك مار نصرالله بطرس صفير والامام موسى الصدر وكمال جنبلاط ، انت سعيد عقل وشارل مالك وغسان تويني وأمين معلوف وحسن كامل الصباح، انت ريمون جبارة ومنير ابو دبس وفؤاد افرام البستاني، انت جورجينا رزق  وايلي صعب. صعب يكسروك، صعب يهزموك، صعب يطفوك. صعب لأنك انت كمان الاف الشهدا، ومئات ضحايا انفجار بيروت. معقول تقبل تترك دمّن يروح هدر؟ الوضع صعب ايه، بس مش انت اللي بتستسلم.  انت رح تبقى، وكل هول اللي ما ذكرناهم، ما حدا رح يذكرهم غير بالعاطل.
قوم، صلّب إيدك عوجك، قول لا اله الا الله، ما تخاف، ما تخاف، ما تخاف. صلي ل الله وشربل ورفقا وسيدة لبنان ، واتكل على حالك. قوم، كسّر هالصمت وهالاستسلام  وهالخيبة اللي فيك. قوم، انت لبناني، انت مش غبي ولا غنم ولا خاتم باصبع حدا. 
قوم قوم قوم، انت لبنااااااااااني.
دخيلك قووووووووووووم. قوم.