الاحداث- كتبت جوزفين حبشي

عن جد، ما بعرف ليش هالقد هالاماراتيين مبسوطين انو وصلوا عالمريخ. فلقونا انو هني اول دولة عربية بتحقق هالانجاز.
 حرام ولو، وين عايشين هالاماراتيين؟ انو  الدولة الاماراتية مفحوطة ومعذبة حالا وحاطة شاشات عملاقة وعم بتفرجي شعبا والعالم هالانجاز التاريخي حسب ما هي مفكرة. ايه ما تعيشوها كتير يا تسلمولي، اذا انتوا فرجيتوا شعبكن شقفة مسبار عم يبرم حول المريخ من كم ساعة، نحنا الحكّام عنا عم بيفرجونا نجوم الضهر من سنين وسنين. مش بس شفنا نجوم الضهر، سمعناهن مع الاعلامية وفاء شدياق . انو هيّنة كتير الواحد يوصل للمريخ ، بس نجوم الضهر ما في حدا غيرنا ممكن يوصلا او يسمعا، نا نا نا ووز عينكن وز. 
بعدين الطلعة عالمريخ صارت هيّنة، وهالخطوة كل دول العالم بتحلم فيها من ايام نيل ارمسترونغ والقمر والناسا وابولو ١٣ ، والافلام الهوليوودية سبقتقن من زمان وهجمت على الكوكب الاحمر اللي ردلها الإجر مع "مارس اتاك" ، بس انتوا وكل كل كل دول العالم ، شي مرة حلمتوا او تأملتوا او خطر على بالكن انكن تنزلوا عجهنم الحمرا؟ شي مرة قلتوا كان بدنا ننزل على جهنّم وما خلونا؟؟؟ شو؟ ٢/صفر ، ما هيك؟ 
على كل حال انتوا عندكن هالشقفة مسبار الامل طاير بهالفضا، ونحنا عنا كذا تيار  مطيريلنا ضبنات عقلاتنا، ومغرقيننا تحت قاع القاع، وأمل واحد مربي الأمِل بروسنا كلنا، وحزب الهي، كل اعضاءو ملايكة بجوانح مهمتن يحملونا واحد ورا التاني عسابع سما( من السعادة طبعا)، بلا صاروخ وبلا بلوط وبلا مسبار وبلا صحن طائر بيخرق جدار الصوت، لأنو ببساطة مزوّد بكاتم صوت... ايه شو لكان؟ نحنا عنا تكنولوجيا!
انتوا بعدكن عم بتدوروا بفلك المريخ، ونحنا والقمر جيران من زماااان بفضل سفيرتنا الى النجوم. انتوا عندكن شقفة مسبار واحمد دوغان عندو "قمر لكل الناس وقمر ليّا انا". يا تسلمولي شو عم تحكوا انتوا؟ كيف الكن عين عم تحكوا بمسبار  عم بيدور بفلك المريخ بال ٢٠٢١؟ ليك وين بعدكن يا حرام. ولك ربيع الخولي من التمانينات يمكن، طال بايدو النجمة اللي ما بينطال وعلقها عصدر حبيبتو قونة.
 مش بس هيك، نحنا عنا، برامج التلفزيون عايشة على غير كوكب و بيار ربّاط وال alien الاخضر اللي معو ، بيغطوا يا نوسن كل اسبوع، شي  على اورانوس ، شي على عطارد او بلوتو . وعلى كل راس سنة ، ماغي فرح بتعمل جولة فوق، وبتفوّت عطارد بالمريخ  والزهرة بنبتون بمربعات( مش امنية)...
يعني بالمختصر المفيد، ما كتير تشوفوا حالكن انو مسباركن عم بيحوم حول المريخ. ايه والله والله لو عندكن متل اللي عنا، كان غط مسباركن على لالا لند ، وانتوا كان غطّ على قلبكن.

============