الاحداث- كتبت جوزفين حبشي

يا “نوتي” لبنان العظيم، احزروا مين جايي يزورنا ععيد الميلاد؟؟؟
احزروا مين مشرّف لعنا ب22 و 23 كانون الاول؟ لأ، بابا نويل ما عاد فيه لا يروح ولا يجيي، بابا نويل راوح مكانك يا تسلمولي. يلا احزروا بعد؟ مزبووووط، قرّبتوا، اللي جايي واصل لعنا من عند أمّنا الحنونة. مين؟؟؟ لأ، ماري انطوانيت مش فاضية تجي تتمنالكن " ميري روز كريسماس"، هي مشغولة كتير وعم بتلفّ البيسكوي بورق هدايا بقصر فيرساي لتوزعو على الشعب الجوعان. بس طمنولي بالكن، هي رح تبعتلكن مندوب عنها ، ساكن قصر  الاليزيه ، اللي جايي ومعو الهدايا والبوش دو نويل والماكرون المحلي المحطوط على كريما. 
لأ، لأ ، ما بدي ياكن تنأزوا وتعتلوا همّ . صحيح سانتا كلوز از كامينغ تو  داون تاون وبعبدا وعين التينة وال"بانليو" (banlieue)
، وصحيح
‏He’s making a list
‏And checking it twice
‏Gonna find out Who's naughty and nice
بس مين قال انو انتوا " نوتي"؟؟؟؟
هلأ للصراحة، ما بعرف ليش طالع عليكن هالصيت يا ملايكة بجوانح انتوا ، بس كل شي فيني قلّكن ياه: يا ما بالسجن مظاليم، وبرات السجن الله العليم. بليز طمّنوا بالكن ، انا مش خايفة  عليكن ابدا، وببصم بالعَشرة وبعِشرة هالعمر معكن، انكن كتير نايس ، ولذيذين وبتنحطوا عجرح هالبلد بيطب ساكت. انا واثقة انو ماماكرون نويل الحنونة رح تكون فخورة فيكن هالمرة، لأنو التالتي ثابتة، من بعد ما شمطتلكن دينكن بالمرتين الماضيتين. لهيك حضرولي حالكن لعقوبات 
‏ Par milliers 
اول ما طيارة الماما 
‏descendra du ciel, 
وتأكدوا انها ما رح تنسى حدا منكن كلكن يعني كلكن يا ...souliers.
و ... ميري روز كريسماس يا حلوين.

===========