الاحداث- كتبت جوزفين حبشي

مش عم بفهم ليش قاتلين حالن ليشكّلوا وزارة؟  مش عم بفهم بشو لحد هلأ فادتنا الدولة والوزارات  ؟ 
اذا بدكن رأيي، انا بشوف انو ما في داعي للوزارة بلبنان تحديدا. سألوني ليش؟
لأنو الناس هني اللي بيعملوا وطن، مش الوطن بيعمل ناس. وكلمة" انت لبناني يعني انت غير" مش كليشيه ومش شوفة حال ابدا. انت  لبناني يعني انت "سوبر مان"و " واندر وومان"، يعني انت الوطن وانت ال survivor وانت الدولة وانت ...الوزارة.
انت لبناني، انت وزارة الثقافة ، ثقافة الحياة . انت وزارة الشؤون الاجتماعية، انت اللي وقفت حد خيّك اللبناني بأزمتو ووجعو وتعتيرو وبلدو المنهوب  ومدينتو اللي اندفنت ودفنت معها استقرارو  وامانو . انت اللي نزلت عالشارع، رفعت انقاض، قززت شباك، سندت باب، واسيّت، مسحت دمعة، مدّيت ايد، طبخت، وزعت تياب وادوية وخفاضات وحليب...

انت لبناني انت وزارة الصحة، انت اللي تعاليت عجرحك  وحوّلت ضهرك وكتفك سيارة اسعاف ، نقلت مصاب، طببت، ربطت جرح وانت عم تنزف، ولّدت ام ناطرة مولودا الاول عضوّ التلفونات، نقلت اطفال حديثي الولادة من تحت الردم لنقطة امان، مسكت ايد ختيار معو الزهايمر ما عبالو يفهم او يتذكّر شو انعمل فيه وفينا. انت اللي تبرعت بادوية مش عايزها بقى، لأنو اللي كان محتاجا، راح لمطرح مش بحاجة لورقة ضمان او فحص PCR ليفوت يتعالج. انت اللي طلعت من بيروت عالبقاع، لتوصّل دوا مقطوع ( او مخزّن بالجارور) لمريض محتاج ومش قادر يتحرّك. انت اللي بيدق عليك الجار الموجوع من بطنو بعد نص ليل ، وبيلاقي عندك قصعين وزهورات ، "وما تنسى تحط لزقة عرق او سبيرتو عمعدتك".

انت لبناني ،انت وزارة التربية والتعليم، وانت  كل أم وبيّ عم بيبقوا الدم ليعلموا ولادن بأحلى مدارس، ويقدمولن سلاح ما ممكن يصدّي او يدمّر بحياتو ، وعم يرجعوا تلاميذ متلن ليفهموا سيستام التعليم عن بعد، ويعلموه لولادن  ...

انت لبناني،انت وزارة المالية ، انت المسروق والمنهوب، ورغم هيك مدّيت ايدك عجيبتك، وتبرّعت بقرش الارملة، وشاركت بتيليتونات ، وحملات مساعدة، وابتسمت وقلت نحنا لبعض، واللي ما بيعطي، ما ممكن يقلّو الله خود.

انت لبناني  انت وزارة المهجّرين والنازحين ،انت فتحت باب بيتك للقريب وللغريب، وانشال من تمّك لياكل غيرك، وعقلبك الذ من العسل، واذا شي مرة تذمرت او فشيت خلقك، بيتهموك انك عنصري.

انت لبناني، انت وزارة الطاقة الفعلية، انت اللي بتنوّر  وين ما بتكون، وبتبيّضها بحضورك وثقافتك وذكاك وفنّك وابتكارك وعلمك بالعالم كلو، ان كان بالطب والهندسة والادب والفن  والجمال والاعلام والموسيقى والسينما وتصميم الازياء والطبخ والخ الخ الخ . انت جبران خليل جبران، وفيروز وصباح ووديع وعاصي ومنصور وزكي وفيليمون وماجدة، انت مايكل دبغي وشارل مالك و ميشال تامر وحسن كامل الصباح وغابريال يارد وعبد الرحمن الباشا وجورجينا رزق وزياد دويري ونادين لبكي وايلي صعب، ومهرجانات بعلبك وبيت الدين والارز واهدينيات ، وجوائز  "تكريم" و" موركس دور" و... و... ومن اليوم لبكرا.

انت لبناني يعني انت وزارة الزراعة بحد ذاتها، بتزرع فرح وحب الحياة والعيش وين ما بتكون. حتى على بلكونك زرعت نعنع وبندورة وخيار. وحتى لما تحاول تتدخّل لتحل مشكل، بتقول " ازرعها بهالدقن". 

انت لبناني يعني انت وزارة الخارجية. انت الموجود  بالعدد برا، اضعاف اضعاف وجودك بالداخل، وعملت جالية بينرفع فيها الراس، وصار اسم اللبناني دليل للتقدّم والنجاح.انت اللي من برا ، دعمت كل شي في ناس جوا، وفتحت بيوت واسست اشغال ، وبفضلك انت اللي برا، قدرنا نبقى نحنا اللي جوا، جوا،  وانشالله منبقى .
انت لبناني، انت وزارة الدفاع. مين قدّك دافع عن ارضو وناسو وحمل البارودي ليحمي امنو ومجتمعو وقت اللي كانت الدولة بخبر كان؟
مين غيرك ما راح عالمدرسة لغيّرو يروح، وما تعلّم الا ضرورة يحمي اللي بيحبّن، وما حصل غير على شهادة الاستشهاد.  مين دافع عن زعيمو اللي اعتبرو ملاك ومثال وافلاطون اللي رح يبنيلو المدينة الفاضلة، وهلأ عم يدفع ثمن تصديقو لهالوهم الكبير؟ مين قدّك وعي ولو مأخر، وقرر يدافع عن كيانو وقيَمو واهلو وولادو  ومستقبلو ومستقبلن، لأنو عرف ولو مأخر انو  هني وحدن الوطن اللي بيستاهل ندافع عنو. 

اللبناني هو لبنان وهو الوطن فقط لا غير. لا جغرافيا ولا تاريخ ولا ارزة ولا صخرة ولا بحر ولا صحن كبة وحمص. لبنان نحنا، امّنا بيّنا اخواتنا اولادنا اهلنا اصحابنا جيراننا، لبنان نحنا بفرحنا بوجعنا، بضحكنا وجنوننا وتكاتفنا. نحنا لبنان، ومش عم بحكي كليشيهات، اذا هو ممكن يبقى، لأنو نحنا فقط لا غير باقيين.ومن بعدنا يبقالكن العدم.
ولكل اللبنانيين، شو ما كانت اهتماماتكن وتناقضاتكن وجنونكن ووجعكن وفرحكن ويأسكن وأملكن واحلامكن، بتمنالكن تبقوا لبنانيي  بهالسنة الجديدة حتى تقدروا تزمطوا منها بأقل ضرر ممكن.

=========