الاحداث- كتبت جوزفين حبشي

"لأ. بزمن الميلاد والولادة اللي غيّرت وج البشرية وبشّرت بعالم جديد من الانسانية والحب ، منزفض نقول لأ للحياة.
لأ، مش رح نقول ما في وطن اخضر حلو  منوّر  متل شجرة العيد، شروشو مكبّشة بتراب قلوبنا، راسو عالي ما بينطال، واغصانو ممدودة متل الايد اللي قدمت وساعدت وشقلت وطبطبت ومسحت دموع.
لأ، مش رح نصدق انو ما في عدل وعدالة ملفوفين بورق ملوّن بلون العيد، رح يفتحها اهالي ضحايا انفجار بيروت وبنتو لجو بجاني، ويفرحوا من قلبن بالهدية. مش رح نقبل ما يكون في كهربا مشعشعة ، ولقمة خبز للجميع، وفرص عمل ومستقبل لولادنا، ومدارس ومستشفيات، ومعارض للكتاب وللرسم ، وشوبينغ وبراندات،  وصالات سينما ومسارح وافتتاحات واضواء وكاميرات وفلاشات ونجوم ونجمات، وجوائز  تكريم وموركس دور ، وضحك وفرح وأمل .
 لأ، بزمن الميلاد ما رح نفقد الامل بصوت فيروز، بحلم ماجدة للبنان الهدايا بالعلب، بضحكة صباح ،بقطعة سما صافية متل وديع، بجمال جورجينا، باوسكار خلّوه زياد ونادين يصير واقع قريب مش حلم بعيد.
بزمن الميلاد، لأ مش رح نقول خلص. مش رح نتشاءم، مش رح نترك ارضنا وقطعة سمانا، مش رح نفل عن سماهن هول اللي طلبوا منا نفل، وبشّرونا بجهنّم، وغرقونا متل سفينة التيتانيك ببحر الفساد والسرقة والنهب والمحاصصات وعلى عينك يا تاجر يا وقح. 
لأ، santa مش claused رغم انو البلد كلو مسكّر ، مطربق، مسدود الافق، والحكومة الانقاذية مش عيديّة، ومش الهيئة رح تبصر النور ، لأنو اصلا لا في نور ولا كهربا. لأ،لأ،لأ....ما رح نزعل على شي، ما رح نندم على شي. بزمن الميلاد رح نقول نعم للنِعم اللي بعدا موجودة بحياتنا، صحيح ما عادت كتيرة، بس بعدا موجودة طالما نحنا موجودين. نعم لضحكة طفل، لدعوة أم ، لشيبة بيّ، للمنقوشة اللي رح تبقى اطيب ترويقة للغني وللفقير، لكاس العرق المقطّر شغل ديّات جدّي وبيّي وغنطوس وبو رعد، ونبيد كفريا وكسارة اللي منرفعهم بصحة العيلة والاهل والاصحاب بغدا يوم الاحد. نعم للاعراس ورش الرز والزهر والاويييييها انشالله بتتهنوا يا عرسان، وانشالله بتبقوا وما بتهاجروا من لبنان، وخلقة كاملة نعمة زايدة، وكاسة مغلي بقلوبات ، صنوبر وجوز ولوز وفستق حلبي، ويربى بعزّكن وما يخطفو انفجار او فيروس او سلطة فاسدة. نعم للبنان، نعم لإلنا نحنا اللبنانيي الواقفين حدّ بعضنا وما النا غير بعضنا ، نعم للشمس اللي مستحيل ما ترجع تشرق، قد ما تأخر الليل والسواد وهالمنظومة الوسخة. قديش بعد رح يضاينوا؟ قديش بعد رح يعيشوا؟ ما في شي ما إلو نهاية.
وبالنهاية، نعم لعيد الميلاد اللي ما ممكن ما يلحقو عيد القيامة. نعم، نعم، نعم...".

=============