الاحداث- كتبت جوزفين حبشي

موضوعي اليوم ما الو علاقة بمسلسل " ع اسمك" اللي عم ينعرض على محطة MTV ، واللي ممضي باسم الكاتبة الجريئة جدا بموضوعاتها كلوديا مارشليان، والمخرج العصري فيليب اسمر. موضوعي الو  علاقة ب "اسامينا، شو تعبوا  أهالينا تلاقوها و شو افتكرو فينا"...
انا اسمي جوزفين . وجوزفين اسم فرنسي طنان ورنّان . بس انو  كيف خطرلن لأهلي يسمّوني هالاسم الفرنسي تحديدا؟
‎ببساطة، طربوش بيّي مش معلق بقوس النصر ولا بالشانزيليزيه، وبيّي بحد ذاتو  لا كان من  متابعي الثورة الفرنسية ولا بطولات المناضل الشرس نابوليون بونابرت بالمعارك القتالية والغرامية. وأمي بدورها ما بحياتا كانت تحلم تكون راقصة ومغنية وممثلة متل جوزفين بيكر  اللي اشتهرت بفرنسا بعد ما  هربت من سياسة التمييز العنصري ضد السود بالولايات المتحدة، وشاركت بالمقاومة الفرنسية ضد الاحتلال النازي .
‎ورغم انو بيّي وامي كانوا مشهورين  اكتر من عصافير الحب بالزمانات، الا انو قصة الحب العظيمة بين نابوليون  بونابرت وزوجته الامبراطورة جوزفين ، ما بحياتها عنيتلن شي. هني انجأ سامعين بروميو وجولييت  وعبدالحليم وشادية، وانطونيو وراكيل اول ما طلعت طفرة المكسيكي. حتى فيلم " خلي بالك من زوزو" ما حضروه عالبرج، لأنو بيّي ما كان متلي ومتل أمي " سينيفيل. طول عمرو كان يغفى اول ما يطفّوا الضو بالصالة، لحد ما حلفت امي يمين ما بقى تروح معو عالسينما.
القصة وما فيها، بعيدة كتير عن التاريخ والادب والفن والعشق العظيم. القصة وما فيها انو بيّي اصرّ يسميني جوزفين على اسم عمتي الوحيدة اللي توفت بعز شبابا( بعد الشر عن قلبي) وقبل ما تخلق حتى محسوبتكم. 
طيب، فهمنا ليش بيّي سمّاني جوزفين، بس انو ليش جدّي وستّي اللي ما بحياتن حطوا اجرن برات دير الاحمر وسهل البقاع، وما بحياتن حضروا تلفزيون ، قرروا يسموا بنتن الوحيدة (عمّتي الله يرحمها)  هالاسم الفرنسي الرنان والطنان؟ هل يا ترى جدّي تعرّف على شي قائد عسكري ايام الانتداب الفرنسي ، وهل يا ترى هالقائد كان جريح حرب، وستّي داوتلو جروحو الخارجية بلزقات خلّ التفاح ولبخات شاي ، وهل يا ترى هالقائد كان مغروم بشي جوزفين ، وكان عم بيهلّوس فيها على الحرارة؟ وهل يا ترى القائد استعد وعيو وصار يخبّر جدّي عن جوزفينتو ، لأنو العشّاق بيعشقوا يحكوا عن احبابن؟ وهل يا ترى جدي اللي ما بيعرف من اللغة الفرنسية غير كلمة بونجور، ما فهم شي من كل شي خبرو ياه القائد العاشق ، وما علق براسو غير اسم جوزفين؟ هل يا ترى؟ يمكن والله اعلم. شو ما كانت القصة من ورا اختيار اسم عمّتي، انا ما بقدر غير ما اشكر ستّي وجدّي الله يرحم ترابن. إنو كتّر خيّرن، لأنو شو كان صار فيي انا لو هني قرروا يسمّوا عمتي: يوسفية مثلا متل ما مصرّ يسميني حبيب قلبي الاستاذ شكري انيس فاخوري، او لبيبة اللي متلي من الاشارة تفهَمُ؟ 
هالسؤال سألتو مرّة لبيّي. انو لو عمتي كان اسما يوسفية، كنت سمّيتني على اسما؟ 
يومها باسني بيّي متل العادة بالغميّزة الموجودة بدقني، وقال لي:" لو شو ما سمّيناكي ، كنتي رح تطلعي انتي انتي، وانتي طلعتي احلى بنت بهالدني كلها، لهيك انتي حلّيتي يا بيّي اسمك، مش هو اللي حلاكي يا ست  زوزو"...
سمعتوا منيح؟ قصدي قريتوا منيح؟ بيّي قال  انو انا طلعت احلى شي بالدني، وبيّي ما بيكذب. معك حق يا بيّي، انا بحس حالي احلى بنت بالكون لأني بنتك وعَ اسمك .

===========