الاحداث- كتبت جوزفين حبشي

السنة الجديدة صارت عالباب، فكل عام وانتوا كبار بكل شي، ما عدا العمر...طبعا منتمنالكن العمر الطويل، بس المهم ما نسألكن ولا تسألونا عن العمر. هيدا سؤال:
قديش عمرك مدام؟قديش عمرك دوموازيل؟ قديش عمرك مسيو؟ بتنسوه نهائيا، بتشطبوه من قاموسكن وإلا بتوقع الكارثة الكبرى، لا بل الطامة الكبرى. 
حتى لما تنغرموا، نصيحة ما تنبسطوا كتير  لمّا الشرشور  يقلّكن "انت عمري"  ويهديكن اغنية أم كلثوم ، لأنو اكيد اكيد بيكون بدّو يتخلّص من عمرو ، مش محبة فيكن، محبة بالعمر الزغير.  والدليل انو أم كلثوم"الكبيرة" قدرا وقيمة، حاولت تغش بعمرا  وكانت ناويي تلغيه بحجة "اللي شفته قبل ما تشوفك عنيّي،عمر ضايع يحسبوه إزاي عليّي؟"...ملعوبة يا أم كلثوم.
يعني بالمختصر المفيد، سؤال العمر، ما بعمركن تسألوه لحدا ، لأنو اصعب من فحص  الباكالوريا بالدولة، والكولوكيوم، وامتحان القبول بالناسا ، بالنسبة لفئة كبيرة من الناس، نساءً ورجالا، ايه ايه رجالا ايضا، لأنو الكل بالهوا سوا ، لما ندق بالعمر.
غريب رعبنا من سؤال العمر، خصوصا لما  ما نعود فرافير . غريب، لأنو كلنا من دون استثناء منحب  ومنسعى لكل شي " كبير" ما عدا العمر، وعدّوا معي:
كلنا منحب نكبر بموقعنا ومهنتنا ومركزنا وكلنا منتمنى يكبر معاشنا وراتبنا و حسابنا بالبنك. حتى الواحد لما بدو يتوظّف ، بيكبّر ال CV, ونيالو اللي عندو خبرة كبيرة . ولما حدا يعمل معنا عمل مهم، شو منقلوا؟ "كبرت بعيني، وروح يا كبير". اما اذا حدا تصرّف تصرف مش ولا بد، في زغر عقل وما بيليق فيه، كلنا منقلو " الله يكبّرك"، واذا استرجى حدا يشوف حالو علينا ، منسفقو جواب من نوع" كتير كبرانة الخسة". حتى لما بدنا نقنع حدا بشي، منتسلّح ب " كبّر عقلك يا شيخ"، ولما بدنا نفتخر بشخص رفعلنا راسنا، منقلو " بتكبّر القلب". 
ولِك الله،  الله السلام على اسمو منقلو" الله اكبر"، طيب ليش لما توصل المسألة للعمر، مننفصم؟ انو طبيعي الواحد يكبر بكل شي الا العمر؟ انو عيب الواحد يتخطى سن ال٣٠؟ مش كلنا عم نكبر؟ انو معقول شخص واحد على الكرة الارضية يكون مش عم يكبر يوم بعد يوم بالعمر؟ انو اهانة يكون عمرك ٤٠ او ٥٠ او ٦٠ او ٧٠؟( بعد السبعين ما بيعود حدا يسأل).ليش منفرح اذا ما منعطي عمرنا؟ ليش بدنا نكبّر شفافنا وخدودنا وصدرنا ومؤخرتنا، ونزغّر عمرنا؟ انا شخصيا ما بعرف جاوب على ولا وحدة من هال" ليشات"، وانا شخصيا ما بعمري رح قول قديش عمري، انتوا اصطفلوا، وعمرا ما تكون ثقة بالنفس".

========