الاحداث- كتبت جوزفين حبشي

جاك، جاك... ليوناردو، ليوناردو...ماي داي ، ماي داي... انت عالسمع؟؟؟؟ بشرفك ردّ علينا، التيتانيك عنا عم تغرق ، ولازم تشرّف بسرعة  تخلصنا، دخيلك روّج، عجّل ، دخيلك تعى بسرعة ، كرمال حبيبة قلبك روز، ماري روز  دو اشرفيه. دخيلك روّج، عجّل، دخيلك تعى كمان كرمال اليسا ، سيلين ديون لبنان، اللي انبحّ صوتا وهي وعم تندهلك:  "تعى. تعى كرمالي وكرمال لبنان وماري روز  بنت الاشرفية تعى، تعى بالصدفة تعى، تعى بالليالي تعى"، تعى كيف ما بدك، طيران، سباحة، باللنش باليخت على فلوكة ، بس المهم تعى. شو؟؟؟ والله العظيم مش عم نكذب عليك، هالمرة عن جدّ خلص، خلصنا عالاخر، لبنان ما عاد طائر فينيق، لبنان صار سفينة تيتانيك، واذا مش مصدقنا، فيك تقرا تصريح وزير الخارجية الفرنسي جان إيف لو دريان بصحيفة لو فيغارو : "لبنان هو تيتانيك بدون الأوركسترا, واللبنانيون في حالة إنكار  تام وهم يغرقون، ولا توجد حتى الموسيقى". عجبك؟؟؟ مش بس عم نغرق، وبلا موسيقى كمان. يا خجلتنا بالعالم، ما بيأدي شوهولنا سمعتنا وفقرونا وجوّعونا ونهبونا، كمان عم يقتلولنا ثقافتنا و عم بيغرقونا من دون موسيقى. تصوّر يا جاك انو لبنان بلد الرحابنة  وفيلمون وهبي وزكي ناصيف  وغابريال يارد وعبد الرحمن الباشا ووليد غلمية، ما بقى عندو اوركسترا ولا عازفين ولا موسيقى. لبنان عم يغرق من دون موسيقى . بترضاها النا هاي؟؟؟ ومش بس لا موسيقى يا جاك، لا رقص كمان، يعني بحال جيت وخلصت ماري روز دو اشرفية، اياك ثم اياك تغمرها وتوقف انت وياها على طرف السفينة، وتفتحوا ايديكن وتتمايلوا ، اوعا، بيفقعكن وزير الداخلية ظبط كورونا. نعم  نعم يا جاك، دولتنا حريصة تقوم بواجبها على اكمل وجه، ومش يعني اذا عم يموّتونا غرق وانفجارات وجوع، لازم يفلتولنا الحبل ويتركونا نموت كمان من الكورونا. لأ ما بيصير، دولتنا ما بتقبل ابدا.
جاك، جاك... ماي داي ماي داي، رد علينا، تجيك موجة تجيبك لعنا فورا فورا. دخيلك تعى، واوعا لا تجي ، واوعا تكذب عليي. اوعا، بتزعل منك فيروز. هي كانت عم تمزح لما قالت الكذبة مش خطية . تعى، شايف البحر شو كبير؟ شايف شو مليان حيتان عم ينهشونا من بعد ما فجّرونا وغرّقونا؟ تعى، تعى خلصنا، جبلنا الفرج وجبلن إلن اجَلن. تعى وقول لكل واحد منهم: جاك إجاك ... جاك، جاك، ماي داي ، ماي داي... ماري روز  تغرق تغرق، والموج الازرق في عينيك يناديها نحو الاعمق. ان كنت حبيبها اخرجها من هذا اليم، فهي لا تعرف فن العوم  في بحر مليء بسمك القرش اللي بيعبدوا القرش،قرشنا اللي بلعوه وصار  بكرشن. روّج يا جاك، ماري روز ما عندا 
تجربة في الحب ولا عندا زورق. هي ولبنان ونحنا كلنا عم نتنفّس  تحت الماء ...نحنا عم نغرق، نغرق، نغرق.

==========