الاحداث- كتبت جوزفين حبشي

ولعت الحرب . لأ مش بين ماري روز  دو تباريس  وماري انطوانيت دو باريس. 
الحرب الضروس ولعانة اليوم بين ال "ماري روزات": ماري روز دو سرسق، وماري روز دو تباريس، وماري روز دو سيوفي ، وهنّي التلاتي علقانين ببعضن، ونازلين شد بشينيون شعر بعضن من الصبح. كل الاسلحة مباحة بمعركتن الوجودية ، من شوّبك وسكاكين مطبخ، وصولا للسكربينات بكعب عالي مروّس talon aiguille، لمزيد من الوحشية...
ال"ماري روزات” مستنفرين ، وكل وحدة منهن سكّرت شارع الشاتو تبعها بكياس الطحين. مش الطحين المدعوم، نوووو، طحين الكرواسان والبيسكوي ، 
oui. 

المهم، من بعد ما تقبّروا ، ماري روز دو سرسق توجّهت صوب فرن الحايك، وضربت طوق امني على كل شي في كعك وبسكوت ، وماري روز دو تباريس فزّت على مستشفى السان لويس لتعمل DNA  وتأثبت انها ماري انطوانيت، مرتو الشرعية للويس السادس عشر، بس هو كان يدلّعها باسم ماري روز، لأنو حياتو معها كانت"la vie en rose”. 
اما ماري روز دو سيوفي فحملت السيف والترس، ودبكتها عالتقيل مع كل شي في ماري انطوانيتات وطانطات بالاشرفية، اللي نزلوا يطالبوا بحقن المكتسب حسب التاريخ الفرنسي العريق. نزلوا الله وكيلكن عالريق من قبل "ديريرِت" الضو، ومن دون ما يشربوا  حتى "تاس دو كافيه"  وايدن والكف، وهيدي تضرّك وهيدي تنفعك يا ماري روز دو سيوفي، ومين مفكرة حالك؟ وكيف بيحقلك تلغي التاريخ وتعيدي كتابتو على زوقك؟؟؟بس ماري روز دو سيوفي ما سكتتلن. راسا والف سيف انو هي صاحبة المقولة الشهيرة" اذا مش قادرين تاكلوا خبز حاف من فرن الحايك، او حتى ساندويش فلافل من عند فريحة على ساسين، انو ca va، 
ليش ما بتاكلوا لبنة او تان ( زعتر  زعتر ، ما تضيعوا) من عند bar tartine  
على مار مخايل، او منكوشة (بالكاف بتصير كلاس اكتر) او  كرواسان بالدارك شوكلت ، عند بول، حد مخفر الدرك بالجميّزة؟

طبعا ال " ماري انطوانيتات" ما قبلوا معها، وفقعوها محاضرة تاريخية من ايام الثورة الفرنسية وبونابارت ولويس السادس عشر، وصولا لجان جاك روسو اللي كتب بعضمة  ريشتو  بكتابو " الاعتراف" انو ماري انطوانيت هي اللي بدا تطعمي شعبا الجوعان بسكوت.
-بس اسكتوا يا جاهلين،( هيدي ماري روز دو سيوفي عم بتبهدل ال ماري انطوانيتات دو اشرفية). عن جد انكن مش مثقفين ولا شوي وبتغشوا قدام الاجانب. انو هيك قوام صدقتوا شقفة هالكاتب جان جاك روسو ، وعم بتكذّبوا "روجيه دو بيسكوي"  النائب بالبرلمان اللالاندي، وعضو التكتل القوي والقبضاي؟ 
 انو ناسيين مين بيكون "روجيه دو بيسكوي" ومين بيّو؟بيّو هو البيّ الحنون لشعب مات وعم بيموت كل يوم من الجوع، وانتوا  قدّ منكن مهابيل، عم بتصدقوا امّنا الحنونة  اللي شعبا ما بحياتو جاع، لأنو بحال ما لاقى باغيت، بيلقمش"ماكرون". يلا galops لشوف، كل وحدة منكن على بيتا، وتعلّموا ما بقى تِغشوا قدام الغرب، وتحترموا قياداتكن الذكية . اصلا نحنا ما حدا خربنا غير الغرب وثقافة الغرب. يلا ارجعوا لمرجعياتكن الفطاحل، واسترجوا من هلأ ورايح ما تبصموا بالعشرة ل " روجيه دو بيسكوي" وقد أ...عازارَ من انذرَ.

==========