الاحداث-  كتبت جوزفين حبشي

وصلتني اليوم الصبح نكتة عن الكورونا وقديش طلعت بلا اصل مقارنة بفيروسات وباكتيريا امراض الزمن الغابر. فعلا، هالنكتة خلّتني اترحّم على زمن ما قبل كوفيد، وقول رزقالله على امراض ايام زمان، كان فيها البركة والبحبوحة والصحة، نعم الصحة . بتتذكروا على ايام جنون البقر، شو صار؟ جنّينا من الفرح لأنو صار سعر اللحمة بالارض وكان اللحام يقدملنا كيلو من دقنو ( دقن اللحام  اطرى واطيب لحمة بجثمان المنتقل الى رحمته تعالى، العِجِل)هدية مع كل كيلو سودا نيّة، وكنا كل يوم نعمل باربكيو ونولّع المنقل  ومشاوي وهوّيلو ، وهيلا هيلا هو ، اتفضّل شرّفنا يا حلو...

ولمّا شرّفت انفلونزا الطيور، الفروج والبيض صاروا تقريبا ببلاش، وصرنا نقاقي متل اهل الجبل قد ما تبقطّنا ( بالقاف)دجاج ، وصار معنا كوليسترول وتريغليسيريد من كترة ما قلينا( بالقاف) بيض بزيت وزبدة وسمنة وقاورما( كمان بالقاف).

حتى انفلونزا الخنازير ما اثّرت على حبّنا للشاركوتري والجانبون.ما في غير هالكورونا المقصوف العمر ما خلانا نستفيد منو بشي. دفعنا نيفتنا( مش على راس النيفا، نو) على الصابون والسبيرتو والهاند جل ومواد التنضيف اللي نضفولنا جيابنا وما تركوا أثر لميكروب من فئة الدودو، مروّكبة معو، ومعلّق دوبرياجو ببطانة الجيبة. ويا ريت هيك بس، ممنوع نفتح تمّنا حتى نعترض او نفش خلقنا. الرقابة حاضرة ناضرة على شكل كمامة.
ونظرا لكل ما تقدّم، دعوة لكل الشعب اللبناني للنزول الى الشارع، والمطالبة بمطلب واحد فقط لا غير:
"ما بدّنا تلغولنا الدين العام، الغولنا الكورونا". "ما بدنا تردولنا الكهربا ومصرياتنا اللي سرقتوهن، ردولنا امراض ايام زمان". 
ويا ريت تزيدوا مطلب بعد على شعاراتكن، وهو التالي:
"ما بدنا فيروسات الزعما والرؤسا والوزرا والنواب، بدّنا انفلونزا الخنازير والبقر  والطيور"... 
على حدّ علمكن، اجتاحتنا على ايام فخر الدين شي جائحة منقوشة شي؟ مش كرمال شي، حتى نضيفا عالمطالب فقط لا غير."

==========