الاحداث- كتبت جوزفين حبشي

مدام نعمة، بليز ، اعملي معروف ويرضى عليكي ، بترجاكي تمسحيها بهالدقن، وتسامحي هالشعب البجم اللي مش مقدّر  نعمة وجود جوزك الوزير الهُمام والشهم والسهران بنصاص الليالي عم بيدوّر عن حلّ لازمة الطحين، وتاركك وحدك بالبيت يا حرام، عرضة لهالوحوش البشرية الجبنااااء متل ما وصفتيهم، اللي هجموا عليكي واستفردوا فيكي، وزعجوكي انت وعم تعملي مَسّاج رولاكسان على انغام راوول دي بلازيو، لأنو اسمو بيذكّرك بجوزك حبيب قلبك السهران بنصاص الليالي عم بيدوّر على حلّ يحلّو حلّ لازمة الطحين. عن جد شو بلا ضمير هالثوار . كيف الكن قلب تهجموا على مدام نعمة ؟ ما بيكفّي انو عم بيزعلها ليللو؟ ما بيكفي انو ما عم بتقلّو  انو اشتاقتلو، حتى يضل عامل عنتر برات البيت، ويلاقيلكن حلّ للطحين يا فجعانين؟ الزلمي مش عم بينام يا جماعة، سهران عم ينقل على ضهرو ال 7000 طن طحين ، الهبة العراقية ما غيرا، عرفتوها؟ ايه مزبوط، كياس الطحين اللي انزتوا بمخازن المدينة الرياضية ما غيرن. شفتوا ليش كانوا عم يتخزّنوا؟ لهلأ يطلّعن ليللو، متل ما الساحر بيطلّع  ارنب من طربوشو،  ويحلّ ازمة الطحين يا فجعانين. وانتوا بكل وقاحة
هجمتوا على مدامتو عالبيت وخوّفتوها، وفوق هيك زعلتوا من تغريدتها على تويتر. شو بدكن تقلكن يعني؟ حاسّة معكن وبتفهّمكن؟ عن جد انكم اغبيا يا جبناء متل ما قالتلكن المدام.
بس بتعرفي شو مدام نعمة؟ انتي الحق عليكي. ليش زاربة حالك بالبيت؟ كان لازم تقبلي عزيمة مدام سلامة على مطعم ال Albergo . الله يسامحك، هيك كنتي عم تتبقطي( بالقاموس، كلمة تبقّط= اكل هنيئا ومريئا) اطيب عجينة بيتزا ما بقى ممكن تحلمي تدوقي متلا عندك بالبيت من هلأ لكان جوزك حبيب قلبك ليللو وصّل الطحنة على البيوت.  والاهم من البيتزا بالطحين غير المدعوم، انك كنت رح بتكوني محاطة ببوطة نسوان، عفوا ببوطة صديقات مدام سلامة، يعني ما كنتي رح تواجهي وحدك الثوار اللي هجموا على مدام سلامة ومسّحوا فيها وبجوزا الارض. كنتي شدّيتي ضهرك بدزينة هالستات المطقوشين على اخر طرز، عم بتمزمز كل وحدة منهن كاس wine  سعرو  اكتر من سعر الدعم على الطحين على سنة كاملة. كنتي ما انرعبتي من بوطة هالجبناء الشحادين، اللي جايين ينغصوا عليكن عشاكم الفاخر، بحجة شو؟؟؟ قال شو؟ هنّي ما قادرين بقى ياكلوا لا منقوشة ولا خبز حاف من ورا جوزك وجوزا... اخ يا مدام نعمة، رجالكم انتي ومدام سلامة طلعوا نقمة مش نعمة. جوزك وجوزا ملا جوز، جابولكن جوز كلام  من الرعاع والجبناااا . بسيطة، الحكي ما عليه جمرك، خليهن يحكوا تا ...يشبعوا. وعن جديد من قلبي بقلّك انتي ومدام سلامة، حمدالله على السلامة، والف صحتين، وتعيشوا وتاكلوا كل يوم غيرا.

=======