الاحداث- جوزفين حبشي

- خيّ، خيّ، رفعوا الدعم عن طحين الكرواسان والكعك والمنقوشة.
- خيّ؟؟؟ ولوّ!!! مبسوطة؟
- طبعا مبسوطة، هلأ صار فيني اعمل ريجيم. انا طول عمري قول انو  الدولة عَ سلامتها، بتفكّر فينا وبصحتنا وسلامتنا، وقلبا علينا، بس نحنا شعب نمرود ما بيعجبنا العجب.
- دخلك، ايمتى صرتي عونيّة؟
- عونيّة؟ انا؟ 
- انو السماء صافية والشمس مشرقة والعصافير تزقزق، وعصافير البطن ايضا ستزقزق حبا بنا وبمصلحة رشاقتنا.شو ممكن تكوني غير عونيّة؟
- انا بنت حقانية، ولما العهد يعمل شي منيح، لازم اعترفلو بالانجاز. صرلي من وقت ما خلقت( من ٢٥ سنة يعني) انا واعمل ريجيم، وما كان يمشي الحال، وبدك هلأ ما اعترفلو بهالانجاز؟؟؟؟؟
- والفقير اللي عايش ريجيم قسري، ومش قادر يشتري منقوشة، شو بياكل يا ماري انطوانيت؟ كرواسان؟؟؟؟
- لأ، ما في ياكل كرواسان. احسن شي ياكل خبز اسمر، صحي اكتر. انا ما باكل غيرو.
- ما الخبز الاسمر كمان رفعوا الدعم عنو يا بنت الرقروقي.
- عن جد؟ طيب خبز قمحة كاملة نعمة زايدة، شو؟؟؟
- لحظة، خليني اقرا  هالخبر اللي وصل هلأ على تلفوني: المدير العام للحبوب في وزارة الاقتصاد: ما يتم التداول به عبر مواقع التواصل  الاجتماعي عن رفع الدعم عن الطحين غير صحيح...
- لا ولوووو! مين هيدا الحبوب مدير عام الحبوب؟ يا ضيعان ما انبسطت. معقول هيك يفئسني؟ هيدا اكيد اكيد مش عوّني.

============