الاحداث- كتبت جوزفين حبشي

جلست والثقة بعينيها، تتأمل فنجان المذيعة المقلوب.  قلبت شفافا وقالت : يا شرشورة لا تحزني، ( ما ممكن تقلا يا ولدي، مع انو عمرا من عمر عواميد بعلبك). حاصلو، قالتلا : يا شرشورة لا تحزني، فالتعتير عليكم سنة 2021 هو المكتوب"... العمى ولووو، تقبّرت انا وامي، وما خليتا تحضر  المسلسل التركي ولا   تعرف اذا البطلة رح تروِّح يا حرام، وكل هيدا حتى ما روّح عليي تنبؤات البصارة العظيمة اللي توقعاتا بتصيب اكتر من ميشال حايك وليلى عبد اللطيف والنجم الفضائي مايك فغالي مجتمعين، لحتى بالآخر تتحفنا بتوقّع، تلميذ الدوزيام بيعرفو: التعتير عليكم سنة 2021 هو المكتوب".؟!!!!!
حاصلو، يا حرام المذيعة انرعبت وصفّرنت ودب الهم بركابا اول ما سمعت هالتنبؤ الصادم جدا وغير المتوقع ابدا ابدا . الكاميرامان  زتّ الكاميرا من ايدو وطار متل سوبرمان وجبلا فنجان مازهر قبل ما تغيب عن الوعي على الهوا. كرعت المذيعة الفنجان one shot واتروحنت شوي، وهون البصارة  رجعت ابتسمتلا وطبّستلا على ايدا  وعطتها جرعة امل اقوى من مازهر الكاميرامان، وقالتلا بمنتهى الثقة: ما تخافي، صحيح رايحين عجهنم، والدولار رح يصير بخمسين الف ليرة، ورح نشحد الخبز، ونرجع عالشمعة واللوكس، وعلى تلفون القرص ، واللابتوب رح نستعملو  مخبا ورق وفواتير الكهربا المقطوعة والدش اللي ما بقى رح يهش وينش، بس راجع راجع يتعمّر راجع لبنان. 
المذيعة نعنشت عن جديد وقالتلا بلهفة: عن جد؟؟؟؟
-طبعا عن جد، ولوّ ، شو ما في ثقة؟؟؟ بعدين صحيح انو البنزين الحزين رح يشتاق للسيارات المصفوفة وسمك الغبرا عليها ٣ امتار، والدوا بانادول فقط لا غير ، من وجع الراس للضغطك والسكري والسرطان ، وفيروس كورونا ما رح يبقالو دور ليقضي على ما تبقّى من الشعب اللبناني، لأنو في انفجار جديد، لاحقو عالدعسة زلزال، ومحتمل تسونامي كمان، واذا بقي حدا، النيّزك الواصل على لبنان خاص ناص بالشهر ٤ من السنة الجديدة، بيتكفل بالباقي، والجراد رح ياكل الاخضر واليابس وما رح يترك للزعما شي حتى يلحسوا اصبعن يا حرام. بس رغم كل هول، انا مصرّة طمّنكم وبليز اوعا تعتلوا همّ، لأنو المحظوظ اللي رح يصمد ، رح  يمرق عليه احلى واجمل وافضل صيفية بال 2021.صيفية متل الحلم.

 المذيعة المصفرنة،اخدت نفَس واخدت لون، وصارت برونزيه (من برونزاج)،على اساس ناطرتنا احلى صيفية بال 2021 ، واخدت اتصال:
-الو، اهلا مدام، اتفضلي شو بتحبي تسألي البصارة عن سنة 2021؟
-بونجووور شيف انطوان، والله حابي اعرف كيف بيطبخوا المقلوبة؟
-ما تواخذينا مدام، صوتك كان عم بيقطّش، بس بعتقد فهمت سؤالك. حابي تعرفي اذا ايامك رح تكون مقلوبة بالسنة الجديدة. شو حضرة البصارة؟؟؟
-مقلوبة لأ، طمني بالك مدام، ايامك رح تجلَس، خصوصا بالصيف. صدقوني احلى صيفية رح تمرق على كل اللبنانيي بالصيف.
-خيّ، الحمدالله، ومناخد  اتصال جديد، اتفضل مسيو
 -مرحبا، والله انا حابب اعرف مين رح يربح بطولة كرة القدم  بال 2021، شباب الساحل او العهد؟ 
-العهد اكيد هو اللي رح يربح بالاخر يا مسيو، صحيح طوّل بالتحماية، بس خود من هلأ ورايح على انجازات واهداف  وغوووول. وبحب طمّنك انو توقعاتي للعهد بتمتد لأكتر من سنتين، وعينك تشوف العهد الجديد شو رح يبيّضها ، خصوصا انو انا شايفة  جان عبيد عبيدو، جايي بالمية المية، ورح ضل رددها من عبكرا لعشية، لحد ما تتحقق، قولوا انشالله!!!!

وقالت المذيعة انشالله من قلب قلبا، وشكرت البصارة جدا جدا على التنبؤات اللي اتحفتنا فيها، وما نسيت تتمنالها الها ولكل اللبنانيي happy new year.

==========