الاحداث- كتبت جوزفين حبشي

نيالك يا بربارة . نيالك ما خلقتي على ايامنا . 
نيالك ما حطّيتي على وجك الحلو كمامة كورونا متلنا ، ونيالك كمان مرة لأنك هربتي من الحجر المنزلي ، وتخفيتّي ب"ماسك"  حتى ما يمسكوكي جنود بيّك  الظالم  الناوي يقتلك ويحسب الله ما خلقك، oops قصدي يحسب التمثال الوثني ما خلقك، فطبعا كلنا منعرف انو بيّك يا بربارة ما كان يآمن بالله ولا هو  من حزبو اصلا. بيّك كان... وثني، بيعبد مصلحتو ومصرياتو فقط لا غير، وجن جنونو لأنك انتي بنتو عندك ايمان قوي بالمسيح، وبدّك تكسبي
 السما، مش جهنّم مطرح ما كان معيّشك.

المهم، عن جد نيالك الف مرة  وبرافو وبهنيكي يا قديسة بربارة  لانك حاولتي تثوري وتهربي من واقعك متلنا تماما، بس ما فيني ما الك " الله يسامحك" على هالعملة اللي عملتيها. شو كان بدّك بهالتشنطط على الطريق؟ يا ريت ما تعذبتي وهربتي ، كنتي على القليلة تفجّرتي متلنا بقلب بيّتك انتي وقاعدة محترمة، وحاطة اجر فوق اجر . بسيطة، هيك صار ، بس هيدا ما بيمنع انو عن جد نيالك ببيّك. بيّك اللي رغم ظلمو، كان متمسّك فيكي ، زعل انك هجّيتي من البيت، وما بحياتو اتحفك بجملة: اذا مش عاجبك فلّي. نيالك بيّك كان همّو يزدلك مالك وجاهك ومركزك. صحيح سرقلك احلامك وقطعلك عمرك، بس بترجاكي ما تنئي ، واسألينا نحنا المجربين، صدقينا يقطع عمرو هالعمر اذا  بدا تنسرق اموالك، وتندفن كرامتك، وتتغمّس لقمتك بالذل، وينفقد دواكي، ويموتوا ولادك لأنو نسيوا يحطوا " ماسك" تا ما يلقطوا فيروس الفساد والمحاصصة والفجعنة على تقاسم قوالب الجبنة، وهني ما معن حق منقوشة...

نيالك يا بربارة انت هشلتي وارتحتي، ونحنا بعدنا بمطرحنا، عم نرجع كل يوم لورا، وبعدنا عم منغني غنية هاشلي بربارة اللي الفها فيليمون وهبي للصبوحة، وصرنا ندق عبواب الجيران والمحسنين ، نطلب مصاري ومساعدات، والقمح اختفى من الكوارة ، وصاحبة البيت ما عادت زنغيلة، وما عاد حدا يحلّ الكيس لأنو بطّل في لا كيس ولا عريس ولا حتى عروس لبنة، انجأ خبز حاف.

بربارة... نيالك يا بربارة، انتي قلتي لأ لقرارات بيّك،  وثرتي، وهشلتي، وانقتلتي وصرتي قديسة، ومطرحك فوق بالسما. اما نحنا يا بربارة، قلنا لأ، وثرنا وهجّينا و... بجيّنا وصرنا شهدا، بس للاسف بيقنا بمطرحنا، هون ، تحت، بجهنم.

============