الاحداث- كتبت جوزفين حبشي

عندي صديقة ، هي بتعتبر حالها "بشعة" ، وانا بلاقيها مش بشعة لأنها كتير مهضومة، حاصلو، لا مجال هلأ لتحليل وتحديد معاني الجمال لأنو اصلا ما عم فكر انجح بفحص اسئلة ملكات الجمال، لا انا ولا صاحبتي.
 المهم وبالعودة لصاحبتي اللي بتعتبر حالها كتيير بشعة، وما بحياتها حاولت تزبط حالها وتنتف حواجبها وتتبوّدر وتتحمّر وتتكحّل، قررت هونيك نهار انو تروح تعمل ماكياج بروفيشنل فرد مرة لأنها معزومة على عرس مهم. وبما انها مش خبيرة بالموضوع، وما بتعرف ال makeup artists المهمين بالبلد, قامت المسكينة هي وبسيارتها على الطريق، بتشوف يافطة على بلكون بناية، تاشة ومشطشطة كحلة حروفا من الشتي، وبصعوبة بتقرا: 
"جمالك تاج، 
مع احلى ماكياج"....

 وصدقت صاحبتي، وصفّت سيارتها تحت ارمة ممنوع الوقوف، واخر همها تاخد "ظبط"، المهم يزبط جمالا. وعربشت صاحبتي عالطابق التاني من البناية، مطرح ما اليافطة مربوطة عدربزين البلكون. بتدق عالباب المفتوح ربع فتحة، وبتفوت وبتتفاجأ بصوت نانسي عجرم عم بيشخبط شخابيط وبيلخبط لخابيط على العالي. صحيح انطوشت صاحبتي، بس صور  البنات المرسومين بالالوان على الحيط،  فرفحولا قلبا وطمنوها على مستقبلها الجمالي. يايييي شو حلوين ، بيهبلو قد ما هني مبودرين ومكحلين ومحمرين. صاحبتي اتفاءلت بالخير، بتقرّب حد الست المستشقرا القاعدة ورا الطاولة وعم تعلك، وبتبتسملا. الست بتجؤرها من تحت لفوق وهي بعدا عم تعلك.

-ايا ساعة موعدك damouzééél؟

-عفوا، مش عم بسمع، بتزعل نانسي اذا بتوطيلا صوتا شوي؟

بدل ما توطّي الست صوت نانسي، بتعلي صوتا هيي وبتجعر بصاحبتي:

-ايا ساعة موعدك damouzééél؟ 

بيني وبينكن،صاحبتي اللي ما بتسكت عادة على ولا كلمة بتنلفظ غلط، ما انقهرت من لفظة damouzééél , زعلت من المعنى المستتر ورا الكلمة. إنو ليش قالتلا "داموزيل" وهي عاطية عمر ال45 وفوقن حبة مسك؟؟؟ "شو قصدا يعني؟ قد ما انا بشعة، ما ممكن كون الا "داموزيل"؟؟؟؟( هيدي صاحبتي عم بتحلل)

-شو؟ نسيتي ايا ساعة موعدك؟

-لأ، بس مش اخدة موعد

-مش اخدة موعااااااد؟؟؟؟؟؟؟؟

هون صاحبتي اصفرّت واخضرّت، وفقدت الامل انها تتحمّر وتتبوّدر، وبرمت بارضا وتوجهت صوب الباب. وإذ بتصرخ فيها الست هي وعلكتها: 

-لوين داموزيل؟

-انو لبرا،  ما الداموزيل مش اخدة موعد .

-حظك حلو .في داموزيل
 تانية لغيت موعدها من شوي. رح فوّتك محلا.

هون انبسطت صاحبتي وشكرت الله انو فيها شي حلو: حظّا. وهيك فاتت ، وانبطحت عالشاريو، وبلّشت  ال " makeup artist" تفرفك فيها، وتدهونلا كريمات، وتطلسلا الوان وتركبلا رموش ، وتشخبطها شخابيط وتلخبطها لخابيط، وصاحبتي ضحكتها شبر، الى ان... شافت حالا على المراية . جمدت صاحبتي فجأة، والتفتت صوب خبيرة التجميل وقالتلا هي ومرعوبة: 
-مين الست؟؟؟؟

بابتسامة عريضة بترد عليها ال makeup artist  : 
-هيدي انتي داموزيل ( حتى انت يا بروتوس؟) شفتي شو تغيّرتي؟ معك حق ما تعرفي حالك. طالعة متل القمر اسمالله...

صاحبتي بتبلع بريقها، وبتقلا للخبيرة: 

-وحضرتك مين...داموزيل؟

-ولو!!! انا  ال makeup artist...

صاحبتي اللي مفكرة حالها البشعة، اخلاقا حلوة عادة، وعادة بتحاول ما تجرح حدا بكلمة لئيمة . بس يومها ما عاد فيها بلعت اللي صار، لهيك فقعتها مونولوغ طولو صفحتين ونص بكل لإمنة:  " انت اكيدة انك خبيرة تجميل؟؟؟؟ وبكل ثقة عم بتقوليها وصامدة يافطة على البلكون؟ ولك انت انجأ ساقطة صف الدوزيام A بمادة التلوين والرسم, ولك انت،انت، انت(هون كانت مرددة تقولا بس بالاخر قالتها)؟ولك انت خبيرة تجميل قدّ ما انا حلوة.
...حلوة منك يا صاحبتي.

=========