الاحداث- كتبت جوزفين حبشي

ألو، الرابية؟ ست الستات؟ فيروز يا فيروز، اشقتلك كتير يا فيروز، وكنت حابّة كتير زورِك اليوم،  واتمنالك عيد سعيد وعمر مديد، بس لا تواخذيني، هالسيارة مش عم تمشي. لأ ما تعتلي همّ، السيارة مش عطلانة. القصة وما فيها اليوم دور المجوّز  مش المفرد، بس اذا بتستقبليني، وحياة عينك لجيب المجوز من عبّود. عبّود ما غيرو اللي بيرقّص أم عيون السود. بعرف هيدي الغنّية للشحرورة، بس صباح ما عادت عايزة لا المجوز ولا المفرد. مطرح ما هيي، لا في "لوك داون " ولا كورونا ولا محمد فهمي ولا حمد حسن ولا جهنّم الحمرا. شو؟ بتستقبليني؟ خليني بالبيت؟ الله يخليني خليني بالبيت؟ ليش ولو؟؟؟؟ لأنو بيتي انا بيتِك؟ ايه ما في شك، بس حابة عايدك. شو؟ مين قلّلِك سكًر بيّي البوابة؟ مش مزبوط هالحكي، بيّي ما سكّر البوابة، ولا سكّر البلد ، اصلا مين غيرو فتحلنا الباب ، وقلّنا اللي مش عاجبو يفل؟ وطيري يا طيارة طيري يا ورق وخيطان . بزيادة على رقبتنا ورق وخيطان، لأنو هيديك الطيارة ما بتطير بلا فيول ودولار ، والفيول اختفى بقدرة قادر والدولار محجوز بالبنك ، واتسكّر عليه البوابة.  شو؟ بجي صوبك؟
ولِك بشو بحلفك ؟ بحلفلك بساكن العالي انو لا البوابة مقفّلة ولا الطريق مسكّرة؟ انت مصدقة قصة الاقفال العام؟ كبّري عقلك يا فيروز، واصلاً انا شاطرة بالتزوّرب، ومش رح اخد جسر انطلياس، في حاجز عليه. رح اخد جسر اللوزية، وبجبلك معي هدية وقية لوز. بعرفك بتحبي كل شي "هالثي" والهدية من قيمتي مش من قيمتك، مع انو سعر وقية اللوز صار قد بقرة جحا على غلا الدولار. شو؟ ما بدك لوز، بدك بندورة؟وجبلية البندورة؟ لا مرشوشة ولامغشوشة  من الجرد البندورة؟ والله كتير صعبة يا ست فيروز، البندورة الجبلية مقطوعة عنا، وقاطعة الحدود على عينك يا تاجر .شو رأيك بكيلو صابون؟ صدقيني كل عمرو غير شكل الصابون، خصوصا بهالايام، كتير مفيد للكوفيد. شو قلتي؟ بطلع صوبك؟ وين شايفي في شتي؟ لأ، الطريق مش بحيرة والشارع مش غريق. هالحكي مجرد اشاعات مغرِضة هدفها افشال العهد. قال الشارع غريق قال!!!! ابدا مش صحيح. انو عادي تطوف الدني وتغرق الشوارع لما تشتي، ما بيأدي كل شي منشّف عنا، بدك كمان طرقات منشّفة تحت الشتي؟ بعدين الشتي خير، ومش انت بعضمة لسانك غنيّتي:" شتّي يا دنيّي ليزيد موسمنا ويحلا"؟ شو؟؟؟؟ ايه معك حق، انا قلت بعضمة لساني انو الموسم كلو مقطوع عنا وقاطع لعند غيرنا. بسيطة مشّينا يا ست فيروز ، ما نحنا وحدة مسار ومصير ومش قاسمين. في بيناتنا تبادل تجاري، نحنا منبعتلن فيول وبندورة ودولارات، وهنّي بيغرقونا بالنازحين. شو؟ بجي لعندك؟ ما بقى عم اسمعك منيح، بشرفك علّي صوتك.... صوتك بعيد ، وصوتك هو العيد، وحامل شمس وفيي ولون التين والزيتون وريحة الطيّون يا ست الستات. شو؟؟؟؟ بجيب الصابون وبمرق صوبك، او رح تزحّطيني؟ الو... الو؟؟؟ زحط الخط.

=======