الاحداث- كتبت جوزفين حبشي:

-الو... الو... يا عمّي ردّي عليي، شو في؟؟؟ شو صار؟؟؟ ليش مدبرسي؟؟؟ ليش عم تبكي؟ حاطة مصرياتك بالبنك و" اورفوار" و " مرسي"؟

-يا ريت

-يا ريت؟؟؟؟ اوووف، شي اخطر من المصاري؟ اوعا تكوني مكَوّرنة؟

-شو يعني؟

-لاقطة كورونا

-يا رييييت

-كمان يا ريت؟!!!! طيب شو؟ يييي عرفت، مقطوع البوتوكس، ما هيك؟

-يقطع عمرك، ما تزيدي على قلبي، انا بعدني فرفورة . 

-إيه، إيه، بهيدي معك حق، انا وياكي بعدنا بالطعش. طيب بشرفك، ليش مدبرسي وزعلانة؟

-عايشي "شاغران دامور" بعيد عنك ، وبعيد عنو حياتي عذاب.

-حبيبتي، لا داعي للهلع. ما اصلا انتي بعيدة عنو، نسيتي انو في "لوك داون"؟

-ولما يرجعوا يفتحوا البلد بعد جمعتين، شو بعمل انا؟ بتتخايلي التقي فيه بشي مطعم او pub او عند اصحابنا؟ بجنّ، بخوت.

-خلص، لا داعي للهبل حبيبتي، هلأ بحكيلك محمد فهمي وحمد حسن، وبطلب منهم يمددوا الاقفال العام ، شي عام، لحتى تشفي من فيروس الحب .

-وبركي ما قبلوا؟

-بيقبلوا، بيقبلوا، وبيستمنّوا

-وبركي ما شفيت؟

-بتشفي. بيقولوا اذا ما بتشوفي حبيبك

-"اكسي" اذا بتريدي

-طيب، "اكسيك"، اذا ما بتشوفيه ولا بتسمعي صوته لمدة ٣ اشهر،  صدقيني بتنسيه وبتنسي بيّو كمان.

-اصلا ما بعرف بيّو، ما عرّفني على اهلو هالواطي.

-شفتي؟ يعني ما كان " اهل" لحبّك.

-وااااااع ( بعدا عم بتفحّش)

-ولِكْ شو في؟ وقفي بكي بشرفك. إنو اذا زعلتي وانقهرتي وبكيتي ونتّفتي شعرك ونزعتيCD "يا خاين ما لكش امان" قد ما رح تتسمعي عليه، ممكن يرجع يمشي الحال بينك وبينو؟

-لأ، ما بعتقد. ايظنُ اني لعبةٌ بين يديه؟ خلص كل شي تغيّر بيناتنا.

-لهيك  غيّريلي مزاجك انت كمان، وزتي ورا ضهرك، واقلبي الصفحة واضحكي واصبغي شعرك اشقر( هيك الاوكسيجان بينتّفو  عنك) واتسمّعي على غنيّة  سميرة سعيد:"واديني سيبته وشفت، اهو ما حصلش حاجة"

-ايه، بس سميرة  بتقول بمقطع تاني: 
" ما تمثليش انك عايشة طبيعي وعادية".

-حبيبتي، اسمعي مني ومثّلي . تخيّلي حالك فاتن حمامة، ومثّلي انو آخر همّك، وعيشي الدور للأخر. 

-ولوّ؟؟؟ فاتن حمامة!!!

-إيه، معك حق، فاتن رومنسية و مغلوب على امرا. بدنا ممثلة مفحّلة ومتل إجرا ، وإيدا طايلة. خلص ما تعتلي همّ، هلأ بتّصلك بمنى طايع، ما في غيرا ممكن تكتبلك شخصية مرا قوية وواثقة بحالها، وقادرة تفرجي الرجال نجوم الضهر. اما بالليل فلازم طبعا تضهري وتسهري، وهيك ممكن تتعرفي على حدا احسن منو.

-اضهر واسهر؟؟؟ نسيتي انو  رح تطلبي  من محمد فهمي وحمد حسن يخلّوا ال "لوك داون" شي عام، لحتى اشفى؟

-مزبوط، نسيت . خلص،لا داعي للهلع، هلأ برجع بحكيليك معهن ، وبترجاهن يفكوا ال "لوك داون". هنّي اصلا " يويو" ومقضّينها يفتحوا ويسكّروا . بعدين مش وحدن الكورونا والوضع الاقتصادي والجوع والانفجارات بيموّتوا الناس بلبنان، كمان "الشاغران دامور" بيخلينا ننهار اكتر من الليرة بوج الدولار . يقطع الحب من طرف واحد شو بيذلّ، متلو متل وقفتنا قدام محطات البنزين عم نشحد ١٠ ليتر، او بالسوبرماركت، عم نتفاوض على علبة لبنة تانية، او بالصيدلية عم نترجّى علبة دوا  مخبّينو وعم بيقولوا عنو مقطوع . لازم الحكومة عنا تاخد الحب بعين الاعتبار، وتضيفوا على اللائحة المدعومة. يلا، يلا، شدّيلي حالك، رح نرجع نضهر ونسهر، واكيد رح تتعرّفي على حدا احسن منو.

- وإذا الاحسن منو،  عمل اضرب منو ؟

-إيه، عادي، ما حصلش حاجة، ساعتها بترجعي بتشغلي الCD

-أيّا CD؟؟؟ سميرة سعيد؟

-لأ، اكيد بيكون انتزع. ركّي  عالبطيخ. " بلا حب وبلا بطيخ" لفارس كرم.

-ييييي، يؤبرني انشالله شو كان  يحب البطيخ.

-وبطّل يحب البطيخ؟

-لأ، بطّل يحبّني...

-طيب ، اذا هيك ركّي على "كان غير شكل الصابون". الصابون ما في متلو للكورونا ولل "شاغران دامور".كل ما تجي صورتو على راسك، بتفركي ذاكرتك 30 ثانية بالصابون، وبترشرشي قلبك بالديتول والسبيرتو، وبتفركيه منيح بال " هارت جِل" ،وصدقيني ساعتها رح تنسي حتى سيرتو. 

-واااااععععع

-لا حول ولا قوة. ما على اساس اتفقنا، خير شو في؟؟؟؟

-على سيرة بنسى سيرتو، ذكرتيني "بسيرة الحب" لأم كلثوم. يسلملي انشالله شو كان يحبا.

=========