الاحداث- كتبت جوزفين حبشي

يا حرام شو تعبوا وبرموا افلاطون والفرابي على المدينة الفاضلة من دون ما يلاقوها اكيد، وعن جد hard luck إلهم ، ونيالنا نحنا شو محظوظين انو خلقنا بهالعصر الحديث، وبزمن الفيلسوف الرائد مارك زوكربرغ اللي يعطيه الف عافية لأنو اكتشفلنا اخيرا المدينة الفاضلة. فيسبوك-المدينة الفاضلة اللي شغلت بال المفكرين والفلاسفة على مر العصور، نحنا اليوم عايشين فيها  (تانكس تو مارك) احلى عيشة، بسلام  وحب غير مشروط. مش معقول الناس شو بيحبوا بعضن بهالمدينة، وبيعلنوا مشاعرهم بمنتهى الديمقراطية  والحب والغرام والهيام ، على جدرانها وحيطانها وشوارعها. مش عم صدق كمية الحب والغنج والدلع اللي بيغمروا بعضن فيها الناس بهالمدينة الفاضلة الفايسبوكية، والبَوّسات والقلوب واللايكات اللي بتهطل عليهن متل زخ الشتي، ويا قلبي وروحي وعمري وامل حياتي ، ويا امايزينغ انت ،ويا بيوتي كوين، ويا قمر وشمس الشموس، ويا بست فراند ايفر، والله خلقك وكسر القالب، ودقوا عالخشب ، و" انت او لا احد، "و "من بعدك لمين الشمس بتنحني"، و"بيلبقلك لو شفت عليهم حالك" ... 
هالاداء العالي من الحب ، بيجي من الممارسة والتدريب والتعليم، والمدينة الفاضلة  بتخرّج  فطاحل مع شهادة دكتوراه باختصاصات متل الرياء على الاصول والتزلّف والمبالغات ، وبيلاقوا بسرعة شغل بمجالات متل تبييض الطناجر وطرش البويا والضحك عالدقون والتمثيل بمية وج وج  . 
اما المشاغبين اللي مش مقدّرين نعمة الحب والسلام والمثالية اللي موفرتلن ياها المدينة الفاضلة الفيسبوكية، فالسلاح المستعمل لمحاربتن، سلاح سلمي وراقي وما في اراقة دماء . سلاحن التجاهل والحرمان من ال like و البيزويات  والقلوب، و بأسوأ الاحوال unfriend و block. 
صحيح انو المدينة الفاضلة مش مدينة سلام فقط لا غير، وصحيح انو بشوارعها ومن حيطانها بلّشت معظم الثورات الحديثة، وانّشنّت اعنف المعارك الكلامية، والمواقف المدفعية، والقنابل الايديولوجية، بس بمدينتنا الفاضلة ، صاروخ الكلمة ممكن يجرح بس ما بينزّل دمّ، واذا شي حدا بلا دمّ، استرجى يفرجينا دمّ او مشهد عنيف، فخامة مارك زوكربرغ ومجلس وزراء المدينة بيفقعوه بلوك، وبينزلو فيه اشد العقوبات، و au coin ووجو للحيط، وممنوع يرجع يفوت على مدينة السلام والحب واللايكات،الا اذا حلف ما بقى يعيدا. طبعا، معن الف حق، لأنو مدينة فيسبوك مش مدينة امك او ابوك، لتفجّرها وتهدمها من دون ما  تتعاقب على يللي عملتو يا صعلوك.
فيسبوك مدينة فاضلة، واللي مش عاجبو، يتفضل يضهر، يفل، يهاجر،  او ...يدق راسو بشي wall.

==========