الاحداث- كتب رشيد قيامي

ـ ميمو : آلو جوجو، فيكي تحكي أو وعيو جماعتِك ؟
ـ جوجو : شو في عالصبح ؟ بعد ما صارت الساعة سبعة، خير إنشالله ؟
ـ ميمو: منين بدّو يجي الخير منين ؟ كل الليل مش نايمة. 
ـ جوجو: ولك شو في ؟ خلّصيني. حدا بو شي ؟
ـ ميمو : إخترب بيتنا. مقطوع ل " بوتوكس " بالسوق. وعم بيقولو إنّو ما في إلّا بوتوكس صنع كوريا والصين، بسبب أزمة الدولار وعدم تأمين الإعتمادات المصرفيّة لوزارة الصحّة.  
ـ جوجو: العمى على هالخبريّة عالصبح. ما بتجيبي إلّا الأخبار الزفت. بعدين شو عم بتقولي؟ بوتوكس صيني ؟ لا لا لا ، ولا يمكن إستعمل الصيني. أنا الأميركاني ومش عاجبني... بعد ناقص... صيني قال. ما بيكفّي كورَنونا ؟
ـ ميمو : شو هي كورَنونا ؟
ـ جوجو : العمى شو ذهنك غليظ ... يعني بعتولنا ل " كورونا ". طيّب شو العمل ؟ كيف ممكن تمرّ الأعياد من دون بوتوكس ؟ ليكي ملّا جرصة.   
ـ ميمو : ما في حلّ غير إنّو نطير شي جمعة عَ باريس   
ونرجع. ولا يمكن نترك حالنا هيك. كارثة.
ـ جوجو : بتعرفي شو ؟ خلّيني إحكي دكتوري بعد شي ساعة وإسألو وبرجع بحكيكي. ما تخافي، منلاقيلها حلّ. 
ـ ميمو: دخيلك ما تطوّلي، لازم نلاقي حلّ بأسرع وقت، وإلّا حتّى لمراية ما بتعود تعرفنا.