الاحداث- كتبت جوزفين حبشي

كل ما يقرّب عيد الميلاد اكتر واكتر، كل ما عم اسمع اهلي واصحابي واللبنانيين عموما، عم بيهددوا ولادن وعم يزرعولن الخوف بنفوسن، هني وعم بيقولولن: "ما في بابا نويل السنة"و 
‏Santa clause is not coming to town...

نعم نعم،  هيدا اسموا تهديد، وما حدا يقلي اسمو وضع اقتصادي تعتير، ومصاري بالمصارف "اوفريرا"، وعاصمة بإمها وبيّها اتدمرت وصارت بحّ وبخبر كان، بفضل الانفجار. 

ولِكْ انبحّ صوتو  بيّ الكل هو ويقلكن الدني بالف خير،والسماء زرقاء والطيور تزقزق،  ولبنان رح  يسلّمو لخلفو افضل من ما استلمو، وانتوا عبث، ما كنتوا تقتنعوا. وعمّو سلامة قديش حلفلكن إنو الليرة بألف خير وسلامة، وانتوا كمان عبث، ما كنتوا تصدّقوا. شو بدّكن يعني؟ ينزل الدولار للالف ليرة لتقتنعوا؟ العمى شو هالشعب الشكاك انتوا، ولوّ، ما في ثقة؟؟؟؟ 

انو مبسوطين تحطموا معنويات ولادكن بقصة ما في بابا نويل السنة؟؟؟؟ إنو  اذا  "النوتي بوي " اتعاقب، بتقوموا تعاقبوا ولادكن انتوا كمان ؟؟؟؟ 

بعدين تعوا لهون لشوف، مين اللي حطّلكن براسكن انو نحنا اصلا عايزينو لبابا نويل القطب الشمالي هو وهداياه؟؟؟؟ نحنا يا تسلمولي عنا قطب محلّي بإمو وبيّو هون بلبنان. عنا "بابا" الله يحفظو ويطوّل عمرو، وعنا مجلس عيلة طويل عريض، ومجلس أقارب ولا أحنّ من هيك علينا، وأوعا تصدقوا هيدا المتل اللي بيقول " الأقارب عقارب"، حاشى وكلّا. نحنا بفضل البابا والعيلة الكريمة عايشين بنعيم. ولِكْ لأ، مش نعيم قاسم، مش معقول راسكن شو إنو ما بيفرز غير عالسياسة. عم بقصد إنو نحنا عايشين بالجنّة ، وإياكم ثم إياكم تكونوا  هالمرّة صدقتوه للبابا لما قال انو رايحين عجهنّم؟ كان عم يمزح معكن، متل ما انتوا هلأ عم تمزحوا مع ولادكن، فلذات اكبادكن، وحشيشة قلبكن، وتقولولن" ما في بابا نوبل السنة". الحمدالله نحنا مش عايزين ولا ناطرين بابا نويل القطب الشمالي، المغطّس بلون الدم ، هو ومجموعة " اقزامو" اللي بيساعدوه على اعداد هدايا ولا اظرف من هيك. اللي عنا مكفّيين وموفّيين ، ومش حلو الطمع...
أما إنتوا يا اطفال لبنان، تسلمولي، اسمعوا منيح شو رح قلّكن : اوعا تصدقوا البابا والماما اذا قالولكم بابا نويل مجرّد  وهم وخيال واسطورة كلنا (تقريبا)صدّقناها  بيوم من الايام، وطلعت للاسف اكبر كذبة. أوعا تخلوهم يحطمولكن حلمكن بهدية حلوة بتشبهكن. أوعا يخلوكن تفقدوا الامل بوصول بابا نويل الحامل معو اصلاح وتغيير وهدايا كتييييير. أوعا تصدقوهن اذا قالولكن ما في بابا نويل وما في هديّة السنة.في ونص. لبنان هو الهدية. صحيح هالهدية اللي عم بيقدمولكن ياها مش خلف الباب متل ما عم بتقلكن طانط فيروز، ولا بتشبه هدايا طانط ماجدةالرومي اللي بالعلب ، وصحيح انو هالهدية الحلم صارت بفضلهن بتشبه الكابوس، بس عيب ترفضوا الهدية. الهدية ما بتنرفض ولا بتنبدل. اقبلوا الهدية، وخلوها ترجع تصير من قيمتكن، مش من قيمتهن. اقبلوا الهدية وبكرا الا ما ترجع تشرق شمس العيد، ويغيب الليل ويصير مجرّد ذكرى بشعة ، وبالنهاية ما رح يصح غير الصحيح، وما رح يبقى غير... الهدية .
والغنيّة رح بتصير: 
 "راجع راجع بابا نويل، عا ساحة النجمة البعيدة... راجع ومعه الهدايا وانتخابات جديدة. يا بابا نويل ، يا بابا نويل، رجاع لعنّا، وابني معنا دولتنا الجديدة".

=========