الاحداث- كتبت جوزفين حبشي

...ميّل يا غزيّل ، يا غزّيل ميّل ، ميّلك ميّولي، بس بليز مش يوم الاحد، في اقفال تام وممنوع التجوّل للمفرد والمجوز وخصوصا الديليفري، وبعتذر منك، انا مش فاضية اطبخلك واعملك فنحان قهوة واعملك تبّولة... شووووو؟؟؟؟ ما بيصرلي شي اذا طبخت شوي؟؟؟؟ بعد ناقص،انا ست الستات ، بنت الرقروقي، بدّي فوت عالمطبخ واطبخ؟؟؟ يا للهول يا للعاااااار ....ولِك عار شوووو؟؟؟؟
منّي وعليّي، انا معو لوزير الداخلية، ويسلملي فهماتو  هو وعم يطلب من النسوان تحديدا انو يطبخوا شوي يوم الاحد، مع توقف خدمة الديليفري بسبب الاقفال العام. انا بأيدو وانا اصلاً من زمان من اشد المعجبات بسميّو للوزير، الفنان الشهم الجنتلمان محمد اسكندر، اللي غنى: "نحنا ما عنا بنات تتوظف بشهادتها،عنا البنت بتدلل وكل شي بيجي لخدمتها". ايه والله، انا حلمي اقعد بالبيت واتستت واتدلل، وما اكدح من التسعة الصبح لل ٤ بعد الضهر ماكسيموم ورا مكتب، مع ساعة "برايك غدا" و" بوز كوفي" ( استراحة قهوة ) . انا حلمي كون ست بيّت ، على اساس ستات البيوت ما عندن لا شغلة ولا عملة يا حرام، وما بيضلّوا واقفين على اجرين سينغا طق، من الفجر للنجر، ليهتمّوا بكل كبيرة وزغيرة بتخصّ عيلتن، ودوامهن  انجأ ٢٤ على ٢٤،طبخ ونفخ وتنضيف وكوي وتدريس اولاد ، ومن دون معاش. ستات البيوت  مش وزيرات  داخلية البيت ابدا، يعني مش متلن متل محمد فهمي ابدا ابدا. 
ولنرجع لموضوعنا و لمحمد فهمي، انا منّي وعليّي لقيتو مهضوم كتير  لوزير الداخلية، وما فهمت ليش النساء غصّوا بتصريحو ، وما بلعوا اللي قالو؟؟؟ إنو  إهانة يعني يطلب منا نحنا النساء نطبخ شوي؟ إنو عنصرية؟ إنو ذكورية؟ إنو اعذروني بس اللي في تحت باطا مسلّة بتنعرا. وأم المسلّة هي تحديدا  هالستّ اللي ما عندا شغلة وعملة غير تنطر ابو الفهم شو حكي وشو قال. ولك يا تسلمولي يا ستّات يا رافعات شعار المساواة، الحكي ما عليه جمرك. واصلا الوزير ما غلط معكن، والاهم انو ما طلب منكن ابدا، متل ما غيرو عمل انو تستغنوا عن العاملات المنزليات ، وتردّوهن على بلادن، وتشتغلوا محلّن بتنضيف البيوت، وتشطفوا دراج، وتكنّسوا وتمسّحوا، وما في داعي تناموا عند اللي بتشتغلوا عندن ، فيكن ترجعوا تناموا ببيوتكن لأنو الدنيي مليانة "دياب" كاسرة. 
انا ومني وعليي ما اعتبرت اللي طلبو ابو المفهومية كلها اهانة.  انا مثلا اكيد ما بينقص مني شي اذا طبخت لعيلتي، وحطيت المقلة عالنار بدل ما ضيّع وقتي مثلا بتركيب مقلة صاحبتي اللي كبّرت شفافا ، وجاري المرِتّ  اللي عم بيخون مرتو ، ومرت خيّي اللي بتزعل من خيّي لأنو بيفضل طبخ حماتها على طبخا ، وبيفتح مع حماتها سكايب من لندن، تا تعلمو كيف يعمل كبة بالصينية... كبّي ورا ضهرك يا ست الستات المزعوجة من مزحة الوزير، انو هلأ بيناتنا هيدي اللي زعجتك بس  فقط لا غير بتصريحو؟؟؟ مرقتيلو  حضرة جنابك نكتة جورج خباز "كل يوم ديليفري"؟ ليش ما انتفضتي  وثرتي على قصة الديليفري كل يوم ، وهو وحكومتو وحكومة اللي سبقو وسبقو  وسبقو ، نسّونا شو يعني الواحد يغنّج حالو ويطلب ديليفري. هو وحكومتو والحكومات اللي سبقوهم ، فقّرونا ، وسرقونا ، وموّتونا ، وفجّرونا، وجوّعونا،  وخلّوا اقتصادنا بالارض، وخلونا نشتهي نطبخ طبخة بنص ربع وقيّة لحمة. مين اصلا بعد قادر يطلب ديليفري؟؟؟ مين بعد قادر يطبخ طبخة معتبرة؟؟؟؟ يا ريت منرجع نقدر نطبخ ، وانا قبلانة يحصروني بالمطبخ فقط لا غير...
وما تميّل  يا غزيّل ، يا غزيّل ما تميّل، ما تميّل ميّولة، حتى ما تجرصنا ، لأنو الله وكيلك مش قادرين نعملك لا فنجان قهوة ولا حتى تبّولة. قال ديليفري قال.