الاحداث- كتبت جوزفين حبشي

بما انو ميا خليفة بطلة افلام "إحم إحم" ، وانا بفهم شويّ بمجال السينما ، وبيحقلي انتقد مسيرتها الفنية ونزّل اشد العقوبات بحق تمثيلا  بحال ما عجبني، انا قررت اليوم اعملها block على انستاغرام. مش لأنها "ماشية ممشى بطّال وعلى حلّ شعرها لا سمح الله، ( هي حرّة وانا مع الحرية الشخصية) ومش لأنها تمارس العهر السياسي، oops عفوا  عفوا، صار آخد لساننا على هالتعبير،  ميا ما خصّها بالعهر  السياسي. المهم، مش كرمال هيك ابدا قررت انا شخصيا سنغفها سنغف سنغف لست الستات، ولا قررت اعملها بلوك هيك من الباب لل " طاقة" . هي بتستحق البلوك بقوة، لأنها نسيت انها لبنانية، بنت وطن جبران ، خليل جبران، وصفِّت بصف هوليوود هالمصلحجية, وقلّلت  من "هيبة" جبلنا ،  على خلفية الانتقادات الهوليوودية.مش عيب تنتقدي زميل بمجال ال... تمثيل؟؟؟
نعم هالانتقادات سيناريو هوليوودي يا تسلميلي، وانتي ست العارفين بالسيناريوات، لهيك كيف بتصدقي هالفيلم اللي انعمل على جبل لبنان؟  
باااااطِل، عملتك هيدي ما بتنعمل. لهيك، بترجاكن، ما حدا يقلّي طوّلي بالك ، وعدّي للعشرة، خلص انا قررت اعملها block لهالحسّودة اللي بتغار من نجمنا. نعم، كل القصة قصة غيرة وحسد، لأنو هي ما خلّت شي ما عملتو حتى " تنجّم" ، بينما طوم كروزنا صاحب المهمات المستحيلة ، السينما الاميركية كان بدّا تقدّملو النجومية على طبق من دهب، بس هو رفض، وما قبل يصير نجم افلام بهوليوود، وفضّل يبقى يمثّل عنا هون بالهيّبةً،  ويفلمها علينا ، مع انو اداءو المحترف كان ممكن يقطفلو جائزة الاوسكار، وليش لأ جائزة نوبل يا سلام.
فهمتي هلأ ليش انتقدتو هوليوود يا ذكية؟؟؟؟ ولِك اصلا انتي كيف الك عين تغاري منو؟؟؟ انتي نايمة بالعسل، وهو يا حرام ما بيناااام. انتي مستقواية بتضاريسك، وجبلنا مستقوي بدماغو النيّر المشعشع رغم انو كهربا ما في،  وبعضلات جمهورو الضخم و"حليفه" ال iron man يا بنت الخليفة . من الاخر؟ هيلا هيلا هيلا هيلا هو ، خرْجِك كل اللبنانيين ايديّهم فيكي يبلّوا. 
انا شخصيا رح اكتفي بالبلوك ، وبوعدك ما عود احضر "افلامك" مع اني ناقدة سينمائية، ولازم كون موضوعية ، وما دخّل الشغل بالامور الشخصية، بس "اي دونت كيييير". مش بس هيك، رح اعملك كمان انفراند وبلوك وديليت على فيسبوك يا غيّورة، و" بي شور ماي دير" ما رح قلّك انو كان بدّي اعملك بلوك، بس موضوعيتي ومهنيتي... ما خلوني.

========