الاحداث- كتبت جوزفين حبشي

الو الو، الو بيروت، من فضلك يا عينيّي، اعطيني الصبوحة وعجّل بالخط شويّة. 
لأ، مش ملخبطة بالعنوان يا تسلملي، الصبوحة صحيح بطّلت معنا بالجسد، بس روحها الحلوة كانت وبعدا ورح يبقى عنوانها الوحيد لبنان. بشرفك عجّل بالخط شويّة، اليوم ١٠ تشرين التاني، وبدّي عيّدها وقلها “ يا حبيبي i love you, يا حياتي i love you. ما رح قلها انها كانت شمعة تنوّر حوالينا، لأنو رغم وجودنا نحنا وياها ببلد عيّشنا عالشمعة، هي كانت طاقتنا الايجابية،وضحكتها كانت تنوّر عتمتنا، وتشعشع ايامنا نكاية بالكهربا المقطوعة. اخ يا صبّوحة، شو كان بيلبقلك تكوني وزيرة الطاقة عنا بلبنان، بلا مواخذة يعني وبلا زغرة باشراقة ندّوش البهيّة، بس عن جد كنا شعشعنا طاقة ايجابية 24 على 24, وطبعا بلا جمِيلة فاطمة غول وسوناطراك . لأ صبوحة، سوناطراك ما الها علاقة بفرانك سيناترا لا من بعيد ولا من قريب، الها علاقة بجبران. ولِك لأ، هيدا جبران، اهمّ  بكتير من هيداك جبران خليل جبران، نبيّ بلا زغرة وفيلسوف اكتر منو بأشواط، ورسام كمان، بيرسم عالمكشوف وشي بيعجب خاطرك. بيكفي على ايامو  صار في ترسيم حدود. ما بلومك اذا ما تذكرتيه يا صبّوحة، لأنك ما لحّقتيه باخر ايامك، فليّتي قبل بسنتين من  ما يصير  صهر الجمهورية، وسندة ضهرنا ورافع راسنا بكل المحافل الدولية. ضيعانك ما تكوني اليوم معنا لحتى تغنيلو: ايام اللولو شو هلّلولو، شو رشوا ملبّس يا " بابا" وشو هيّصولو. بَرَم الدولاب و غاب و... خلص بلا ما نكمّل الغنيّة، وبلا حكي سياسة، خلينا نرجع لذكرى عيد ميلادك اليوم 10 تشرين التاني. اووووف شو حلو هالنهار وشو كلو تفاؤل متلك. اليوم يا صبّوحة تم الاعلان عن لقاح بيقضي 90 % على كورونا. ولك لأ يا شحرورة، كورونا ما الو علاقة بحبيبة قلبك اللايدي مادونا، هيدا فيروس "انّبز" هو كمان بعد ما انتي فلّيتي. يقصف عمرو " بوسة ما بسنا" على ايامو ، وكمان كان ممنوع  على ايامو هو كمان نلحس اصبعنا، وفهمك كفاية.
اليوم ب 10 تشرين التاني، بيوم ذكرى عيد ميلادك، في بشرى سارّة فرفحت قلب العالم كلو :اكتشفوا علاج رح ينزّل اشدّ العقوبات بهالفيروس الغدار الخبيث. خيّ، ما احلا هالنهار، وخيّ ما احلاكي يا صبّوحة. وباذن الله، سنة حلوة  يا حبيبي، سنة حلوة يا لبنان.

=========