الاحداث- كتبت جوزفين حبشي 

صحيح انا مش " عونيّة" ابدا، ومش " باسيلية" اكتر بكتير من ابدا، بس انا طول عمري بوقف بصف المظلوم، وحرام فخر جمهوريتنا اعتاد انو ينظلم،( هيك هو قال وانا على طول بصدقو لأنو ولا مرة كذّب علينا). فلهيك انا قررت اوقف بصفو اليوم. بعتذر مش رح التزم بقرار التيار الوطني الحر اللي دعا لعدم التوجه للسفارة الاميركية. انا رح اتوجّه، ورح اصرخ بأعلى صوتي بوج الامبريالية الاميركية الغاشمة، ورح احمل شعار" لك يوم يا ظالم"( باللهجة المصرية)، وكرمال عيون المظلوم، رح حاول اتقمّص روح ام كلثوم، وغنّي باحساس كبير كفيل ينزّلي دموعي: "يااااا ظالمني، وانت فين ودعم الارهاب فين؟ وعقاب ايه اللي انت جاي تقول عليــه، انت عارف قبله معنى تدق برمز وطني  ايه؟ طهّر تمّك قبل ما تتكلم عليه ، فساد ايه اللي جاي تقول عليه"؟ طمّن بالك، مش ممكن يذل لساني وقول" ظلم ايه اللي انت جاي تقول عليه"، خلص، انا بصفّك، اتكل عليي. بس ما تواخذني، ما رح استرجي غنّي اي شي لفيروز، رمزنا الوطني، مش لأني خايفة من ريما تحط عليي عقوبات، بس لأنو مش وقتا هلأ ، اجعر بأعلى صوتي الفيروزي وقول:"إنسى ! كيف ؟!والخمس طعشر سنة، كنت بهالدني وماكنت بهالدني،  وتجي وتروح من دوني الكهربا، والفساد والسرقات والصفقات والمحاصصات ضربت طنابا قد الدني. إنسى ؟ إذا بقدر إنسى !
ما تخاف يا قائد يا عظيم، انا متلك ما  بطعن بالضهر، ومش رح احكي بشوية مخالفات وسرقات وصفقات عملتها حضرة جنابك عن غير قصد طبعا،  انو بالنهاية زيوان بلادك ولا قمح اميركا، وانا وخيي على ابن عمي( ذاكرو   ل "اوعى خيّك")؟ ولِك ما تخاف يا غرنديزر جمهوريتنا، صحيح انت ما عدت خيّي، وما بحياتك اصلاً كنت خيّي، مش كرمال شي يعني، بس لأنو عمّك بيكون بيّنا كلنا ، يعني طلعنا ولاد العمّ ، فهمت عليي كيف؟و "انا وابن عمّي عالغريب"، وما رح نسمح لل "عمّ سام" يسمّلك بدنك، نحنا معك ومتضامنين معك بهالمحنة، ونحنا متلك ما رح تخوّفنا العقوبات يا بطل ما بتنطال، واذا ولا البدّ بدو يصير تحقيق، مع انو نحنا مش ناطرين تحقيق لنصدّق انك رمز الشرف والنزاهة، نحنا منرفض تحقيق دولي، ومنصرّ على تحقيق محلي، لأنو قضاءنا ما في انزه منو بالدني كلها، ومن شو بتشكي القاضية غادة عون دخلك؟ ما بعدنا عم منقول" غادة بلادك ولا قمح الصليبي" يا حامل صليب الوطن...
انا اليوم ناطرة طلّتك البهية  بمؤتمرك الصحفي، لتمرمغ الارض بالعدو الغاشم. انا وملايييييين المحبين متلي ناطرينك تطل علينا يا ملاك بجوانح، وترتّل بصوتك الملائكي، ونحنا نردد وراك:الموت لأمريكا الشيطان الاعظم.

======••••