الاحداث- كتبت جوزفين حبشي

نحنا بلد انجازات.
كيف ما تضرب ايدك، انجازات. السلطة عندا انجازات ماشالله، 
والشعب اللبناني كمان :

- جارتنا احلى جارة قدرت تكوي  فستانيها ما عدا الاكمام، قبل ما تنقطع الكهربا. مش مهم، الدني شوب، بترفع كمامها بالعالي .

- المواطن ع. ع( رفض يعطي اسمو خوفا من صيبة عين)  قدر يفوّل سيارتو بنزين بعد نطرة ساعة ونص فقط لا غير ، وقبل ما تصير التنكة ب ٦٢ الف، وز عينكن وز

- المواطنة الحربوقة  قدرت صرفت ال١٠٠$ بالسوق السودا ب مليون و٧٠٠الف، وقبل ثواني من ما يرجع يوطى سعر صرف الدولار ٢٥ ليرة.

- السيدة  ب. ل قدرت اشترت فخضين وجانحين دجاج من فروج مشوي عم  ينباع فلت بالقطعة،  وسلقت حدن  كباية رز،  وعملت وليمة لولادا ال٥ وجوزا  وامها وبيت عمها نهار الاحد. 

- مريضة الاعصاب والضغط  الانسة د. ه انجزت انجاز عظيم. يوم بتاخد دوا الاعصاب، ويوم دوا الضغط. شنّو لما تاخد دوا الاعصاب، بتروق، فما بيعود يعلى ضغطا.  ولما تاخد دوا الضغط ، بتروق، فما بيعودوا يتوتروا اعصابا. ولما يضاينوها الدويين شهرين بدل شهر، يا سلااام على ضغطا كيف بيقشط ويا سلااااامين على منسوب الفرح   شو بيقوى  عندا.  فهمتوا والا بعيد؟

بعد في انجازات كتيييييرة، بخبركن عنها بعدين. هلأ مضطرة اضهر بسرعة تا لحّق كيس حليب مدعوم بالسوبرماركت.  بعرف صارت الساعة ٨:٣٠ والقصص المدعومة بتخلص عالساعة ٨ ، بس  انا متفقة مع الموظف الهندي، بعطيه ٥٠ الف ليشلي كيس ب ٢٥ الف على جنب.  كيف هالانجاز؟؟؟؟