الاحداث- كتبت جوزفين حبشي

- فنانيستا، فنانيستا...
بتبتسم فنانيستا من تحت الماسك الترانسباران المشكشك بالستراس، لوسائل الاعلام المتجمهرين قدام مركز اوسكار للتلقيح بدبي ، وبتقرّب صوبن وبترفع عويناتا الدولتشي
-هااااي فانزاتي حبيباتي
-هايين
-ياي هيدي "هايّين" لبنانية. ذكرتوني بوطني حبيبي اللي عم بيعاني.
- ايوه، ربنا يكون معاكم. بس يا حضرة النجمة الصاعدة، انتي بتعملي ايه هِنا في دبي؟ عندك تصوير مسلسل جديد؟
- اول شي، انا مش نجمة صاعدة. انا صعدت ووصلت للقمة، فانتبهوا لالفاظكن بليز. تاني شي، لأ، انا مش جايه صوّر، انا جايه اتصوّر انا وعم اخد لقاح كورونا، نا نا نا، وز عينكن وز
- ليه؟
- ليه لأ؟ سي الا مود. بعدين نحنا الفنانين عنا مسؤولية. لازم نشجع الناس يتلقحوا، نحنا مثالن الاعلى.
- لكن مش حضرتك حذرتي جمهورك حبيبك من اللقاح، وقولتيلو ما يخدوش؟
- مزبوط، هيدا بالأول، بس من بعد ما قريت اكتر عن الفاكسين، وتعمّقت اكتر فيه وبتركيبتو، وشفت نجوم لبنان عم يشكرو فيه وانو على سلامتو، وكتير سايف وصورهن هني وعم ياخدوا الفاكسين يخز العين، قلت لازم آخدو.
- لكن هيفا ومايا  لسه مش مقتنعين باللقاح وبيحذروا منه.
- فيني قلكن سر؟ بس بتوعدوني يبقى بيناتنا؟ هيفا ومايا ما قدروا اخدوا فيزا على الامارات ، فهمتوا هلأ؟
- لأ
- ما تخلوني قول شي ما بدي قولو، بس بتعرفوا قصة الثعلب اللي ما قدر يقطف العنب، قام قال عنو حصرم؟ ذات الشي.
- يعني لما يوصل اللقاح على لبنان، هيفا ومايا هيعملوه؟
- طبعا
- وانتي ما استنيتيش اللقاح زيهم ليه؟
- عفوا؟ اكسكيوزمي؟ انا اول شي مش زيّهم، الدني مستويات. بعدين انا مضطرة اعمل اللقاح بسرعة، لأنو كان عندي حفلة على راس السنة، كسّرت الدني وكانت مفوّلة، مش متل غيري حرام قعد بالبيت وما طلبوه على ولا حفلة.
- لكن حفلات راس السنة في لبنان هيي المسؤولة عن تفشي الكورونا بنسبة كبيرة جدا.
- ما لهيك انا كان ضروري اعمل اللقاح.
- والشعب اللبناني اللي سهر وهيّص معاكي على راس السنة. 
- مالو؟
- مالوش لقاح؟
- امبلا، بس لازم ينطر شوي. انو  ca va، الحكومة اكيد رح تجيب اللقاح. اذا مش اليوم، بكرا. واذا مش بكرا، بعد بكرا. مش معقول اللبناني شو بصلتو محروقة وخلقو ضيق.
- يمكن خلقو ضيّق علشان خايف نَفَسو يضيق، واجهزة الاوكسيجين مرمية في المدينة الرياضية؟
- ليك، بعتذر بس لازم قولا: اللبناني ببالغ بنظرية المؤامرة ، وانا برأيي لازم يتمتع بروح رياضية، ويتقبّل انو  الدولة ما عندا شي شخصي ضدو. انو اذا  سمحت بحفلات رأس السنة بتكون هي المسؤولة عن انتشار الفيروس؟؟؟؟ اذا خزّنت النيترات بالمرفأ، بتكون هي المسؤولة عن الانفجار؟ اذا ما جابت الكهربا بتكون هي الفاسدة؟ اذا طار الدولار بتكون هي الحرامية؟ بعدين لشو الاوكسيحين؟ لبنان مش بحاجة . لبنان قطعة سما ونسّم علينا الهوا من مفرق الوادي. نو نيد لاجهزة تنفّس، ما في جهاز، شموا هوا الوطن، ما في طحين، كلو بيسكوي ، ما في لقاح انلقحوا بالبيت لحد ما يصير في. العمى ولو اللبنانيي شو نكدين. 
- طيب، وانتي ليه ما شمّتيش الهوا اللي نسم عليكي من مفرق الوادي؟ ليه ما انلحقتيش في البيت؟
- لأنو عندي واجب تجاه جمهوري حبيبي، وواجبي قلّن اعملوا اللقاح متلي، ولهيك انا مصرّة اتصوّر. بس تصوّر قد ما الشعب اللبناني نكد، في مين عم يتهمني اني عم فشّخ. تصوّر؟ معقول؟

=========