الاحداث- كتبت جوزفين حبشي

الضحك والتنكيت والسخرية من كل شي ومن حالنا اول شي، هو اقوى لقاح لبناني ضد اليأس والانهيار . هاللقاح اللبناني اثبت فاعليتو من سنة ١٩٧٥، وقديش بدن فايزر وبيونتيك وموديرنا ليوصلوا لمواصيلو. اللقاح اللبناني مكوّن من اجسام مضادة للزعل، مع كمية كبيرة من ايسانس المثلين الشهيرين" اضحك يا لبناني، تضحك لك الدنيا"، و " نفّخ عليها بالسخرية والتنكيت،  تنجلي"...  حتى لو عم تبكي دم وذل ومرض وجوع  وموت وقهر، اضحك يا لبناني، ونفّخ عليها وانشالله خير... انو اذا زعلت وانهمّيت، بيمشي الحال؟

وبظل اهمال دولتنا باستحضار لقاحات كورونا عالوقت، اللبناني ماشي على اللقاح اللبناني وماشي حالو، وعند كل هجمة جديدة او سلالة جديدة لايا فيروس ، لقاحنا بيحمينا وبيفبرك بالثانية الوحدة، ملايين الاجسام التنكيتية المضادة للاحباط.  
تخيلوا، ما لحقت وزارة الداخلية تطلب من المواطنين يدخلوا  على موقع:covid.pcm.gov.lb
ويطلبوا اذن خروج من البيت خلال الاغلاق التام، حتى ما عادت تلحّق على طلبات هالشعب اللي بيتمسخر حتى على مأساتو، وبيعتبر الضحك اوكسيجين حياتو، حتى لو مات اختناقا من دون جهاز اوكسيجين.
طلبات واستثناءات واذونات على مد عينكم والنظر: في دوموازيل بدا اذن لتروح عالمكتب تجيب التبروير Tupperwareاللي نسيتن، واذا ما وافقولها، ممكن تموت خنق على ايدين امها، وبلا ما تعذّب الكورونا. وفي شب عم بيناشد الوزارة يحصل على إذن خاص، لأنو بدو يضهّر كلبو اللي معوّد يعمل pipi بالهواء الطلق فقط لا غير، وطبعا ما نسي الشب يدعم ملفو بحجج مقنعة متل: اللازيكس مقطوع، وحصر البول مش مستحب ابدا بهالظروف. 
بعدين اوعا حدا منكن يجرّب يكذب على الدولة، اوعا. الوزارة ما ممكن تقبل كل الطلبات هيك بشكل اعتباطي من دون ما تعمل بحث وتحرّي واستقصاء. الوزارة تحوّلت شيرلوك هولمز وعم بتدقق بكل طلب، واذا وصلها طلب من ست بدّا تنزل عالفرن تجيب ربطة خبز، ممكن ترفض تعطيها إذن لأنو زوج الست اخد نفس الاذن امبارح ونزل اشترى ٤ ربطات. نعم! الدولة واعية يا جماعة.
والحلو انو مديح اللبناني لوعي الدولة ، في إلو " سايد ايفكتس" . مثلا، نكتة الدرك والدجاج ما مرقت على اللبناني الحربوق. على الموقع وصل طلب اذن من شب ضرسو طيب، طالع على بالو يضهر يشتري ساندويش شاورما على لحمة. وطبعا اجتو الموافقة، شرط انو يجيب معو للشباب بالمركز ساندويشات دجاج. طبعا انتقادات اللبناني ضربة عالحافر وضربة عالسندان، والدركي اللي بيخالف القانون كرمال ساندويش دجاج، مستحيل يقبل بمخالفة، ريحة الخيانة الزوجية طاغية عليها واقوى من ريحة التوم بساندويش الدجاج. الموقع وصلو  طلب من زوج حابب يضهر يوصّل مرتو عند امها المريضة. وطبعا كان الرد حازم وبيقول: بلاهن هالحركات وانضبّ بالبيت. هلأ وصللنا طلب من حماتك انها جايي تزوركن...
اللبناني ما بدو يصدق انو ممكن يموت بالكورونا، يمكن لأنو بيموت بالحياة . اللبناني بيضحك وبيسخر وبينكّت حتى على الكوارث اللي نازلة عليه متل الشتي، وبيعتبرها لقاحو الفعّال ،  يمكن لأنو هيدي الطريقة الوحيدة اللي تعوّد عليها لمقاومة الاحباط واليأس، بظل غياب تام لدوا وطني او لقاح حكومي  مصنوع من شوية كرامة واخلاق وضمير.

=========