الاحداث- كتبت جوزفين حبشي 

بريكينغ نيوز:
الرئيس ميشال عون رفض ياخد اللقاح المضاد للكورونا وبيفضّل الاكتفاء بالتدابير الاحترازية التقليدية اللي عم يتخذها.

شوووو؟؟؟؟ عم بقرا صح؟؟؟؟ معقول المواقع الالكترونية تألف هيك اشاعة عن الرئيس؟ طيب اذا صحيح الخبر، كيف يعني لا داعي للهلع؟!!!!  اذا مش خايف على حالك، خاف علينا يا بيّ الكل، نحنا ولادك اللي ممكن ننهار ونموت فقع اذا بتدقك شوكة من تاج كورونا. دخيلك سماع قشاع، خود واعطي، فكّر مجددا بحالك وفينا .انت مثلنا الاعلى، واذا انت ما اخدتو، رح ياخد على خاطرو حمد حسن اللي اتعذّب واشترى اللقاحات عالفاضي.  فخامة الرئيس، كل رفقاتك الرؤسا والزعما بالعالم ،الحاليين والسابقين،  اتطوّعوا  واخدوا اللقاح  قدام الكاميرات ليعززوا ثقة شعبن بسلامة الفاكسين ، من بايدن لاوباما لجورج بوش وبيل كلينتون. 
سماع من شعبك وارجاع راجع قرارك ، واتذكر انو  صهرك وسندة ضهرنا  انصاب بالكورونا ولولا من صلواتنا كان راح فيها، وبنتك كلودين اعلنت كمان اصابتها بالفيروس والله يشفيها، وعدد كبير من موظفي القصر ما سلموا من الكوفيد، وحتى الرئيس ماكرون كوْرَن، انو بشرفك خود واعطي.
بمين بحلّفك تا ترجع عن قرارك؟ رح حلفك بالفن والفنانين، الثقافة والمثقفين، لأنو بعرف قديش بتحبن وبيحبوك. انا اكيدة ما ممكن ترفضلن طلب لسبيليرغ لبنان، وبيتهوفن التلحين، وزين شباب الفنانين اذا طلبوا منك تاخد اللقاح.  ولِك سعد الحريري 
تكسّروا اجريه قد ما طلع ونزل على بعبدا ، ليحاول يقنّعك بضرورة اسناد وزارة الثقافة لشخص مش فنان، بس انت رفضت لأنك وفيّ للفن والفنانين ، وراسك والف سيف ما بتعطي حقيبة الثقافة غير  لأمير الميوزك هول وامبراطور نورستان  اللي بيعشق موسيقى النَوَر والغجر .
خلص، رح اعمل اتصالاتي بالفنانين، ونطلع مظاهرة على قصر بعبدا بمحاولة لردعك عن قرارك المتسرّع. رح بلّش شيّك انت لمين من الفنانين عامل follow على انستغرام وتويتر وفيسبوك، ورح اتصل فيهن واحد واحد... لحظة، لحظة، انت عامل follow لهيفا وهبي ومايا دياب؟؟؟ انت من فانزاتن يا فخامة الرئيس؟ له له له، هلأ فهمت، والله يصطفل فيكن يا هيفا ومايا، كان ضروري تصرّحوا انكن ما ممكن تاخدوا اللقاح؟ حبيبي فخامة الرئيس، ما ترد عليّن هول الجوز ،عملّن unfollow،و بوس ايدك  صدقني، ما الك غير اللقاح لحتى الواوا يصح.