الاحداث- كتبت جوزفين حبشي

الحمدالله، والف الحمدالله، و Hell eluyah والف Hell eluya القطاع السينمائي عنا بلبنان بعدو بألف خير، والسيناريوات الخيالية والسريالية عم بتشتّي علينا ، والمخرجين والممثلين على الشعب المسكين بيستاهلوا وبجدارة اوسكار افضل فيلم كوارثي....
فمن بعد النجاحات المنقطعة النظير لأفلام  متل " ابي فوق الشجرة، فوق فوق فوق، حيث العصافير تزقزق والسماء زرقاء"  و" بابا وال ٤٠ فاسد" ، ترقّبوا قريبا جدا، في الصالات اللبنانية ، احدث واضخم انتاجات شركة"عالعهد يا كموّن" : فيلم"تيتانيك تغرق في بحر السمّ، على انغام music hell "، من بطولة "ميشال جاكسون نَوَرستان" اللي رح يحاول ينقذ عزيزتو من الغرق. مين عزيزتو؟ لأ، ما حزرتو، مش سكارليت اوهارا، وانشالله سكارليت اوهارا بتزعل وبياخد على خاطرها و بتزيح وبتذهب مع الريح . وبالعودة لفيلم التيتانيك الجديد، عرفنا من مصادر موثوقة انو اغنية الجينيريك هي طبعا "عزيز يا عزيز والحب شو لذيذ"، والعز  مش للروز ، وسيلين ديون تروح تشنق حالا...
الحمدالله و Hell eluyaو بشفاعة ال saint Michel  (مار مخايل قديس لبنان والعهد، ومش ميشال حايك )النجاح المتوقع للفيلم لا يمكن ان يوصف، ورح يحطّم شبابيك التذاكر ( هيدا اذا بقي في شبابيك ما تحطّمت)، خصوصا انو بيعتمد على كاريزما الامبراطور المُفدّى ، ميشو ديب البحر الكاريبي بشعراتو واكسسواراتو  وحلقاتو اللي رح يتماهوا مع قراصنة الطاولة المستديرة ، وخصوصا رجولة فرقة حصبالله، وانوثة العزيزة والنجمة السمّاوية ( نسبة للسما، ويبعتلو سمّ كل واحد بدو يقوّلني قصص انا ما قلتا)...
ترقّبونا اذاً قريبا جدا، بفيلم فيوجن رح يخلي كل واحد منكن يجن  ينط يجن ينط من التيتانيك اللي عم تغرق على انغام الميوزيك hell . بشرفكن ترقبونا، هيدا اذا ضل في مين يخبّر ويفلمها علينا!!!
خبر عاجل قبل ما نختم: جاءنا كمان من مصادر موثوقة، انو " مار شربل" زعلان كتير، انو ليش  شركة الانتاج ما اختارت بطل على اسمو؟ بشو سان ميشال احسن منو؟ لله يستر، مار شربل عجايبو كتيرة، ودعواتو مستجابة . امين يا رب".