الاحداث- كتبت جوزفين حبشي

باليوم العالمي للغة العربية ب 18 كانون الاول ،رح قلّكم بالعربي المشبرح، ليش بعشق ملكة لغات العالم. لأنها اول شي فريدة من نوعها، وهي تلقّب بلغة الضاد لأنو حرف الضاد مش موجود بأي لغة من لغات العالم، الا باللغة العربية. ويمكن لهيك ولاسباب تانية كتيرة، قال عنها "أمير الشعراء" أحمد شوقي : "إن الذي ملأ اللغاتِ محاسناً.. جعل الجمال وسرّه في الضاد". 
تاني شي، انتوا معكن  خبر انو اللُّغَة العَرَبِيّة هي من اكتر اللغات انتشارا بالعالم، وبيحكيها اكتر من 467 مليون شخص، وتعتبر من أغنى اللغات وبتحتوي على اكتر من ١٢ مليون كلمة، وكل كلمة عندها فوق ال10 مرادفات، وكلمة الاسد على سبيل المثل، عندا 300 مرادف؟
اللغة العربية ايضا وايضا مصنّفة بين أصعب خمس لغات بالعالم، يعني بدكن تسمحولي قولها،  هي مش بمتناول مين ما كان. وهون بيستحضرني مثل عربي بقول: "من لا يطول العنب، حامضاً عنه يقول”. وهالمثل بيعني انو الانسان اللي بيعجز يحقق هدفو، بيحاول التقليل من اهمية الهدف. وطبيعي تعجز الاكترية عن اتقان اللغة العربية، الغنيّة والصعبة والاصيلة، لهيك ببرروا عجزن باهانة اللغة واعتبارها قديمة وما عادت تلائم العصر الحديث، وبيتباهوا انهم بترغلوا بالفرنسي والانكليزي وشوية ايطالي، وhi كيفك ca va, و" تقشعرُّ ابدانهم" اذا حدا حكي كلمة عربي قدامن، ويايييي comme c est pas chic. انا بشك يا جماعة ال je tu il  وال in انكم تكونوا بتعرفوا انو في كتير لغات عالمية، استوحت كلماتها من لغتنا العربية، وخصوصا الانكليزية. 
‏Yes yes i swear، في  10 آلاف كلمة إنجليزية هي بالأصل عربية، حسب موقع اللغات "ماذر تونغ" (Mother Tongue). رح اعطيكم بعض الامثال فقط لا غير : سكر( sugar) و قطن( coton) والكحول( alcohol) والقهوة (coffee)والجمل( camel)والغزال (gazelle) و ياسمين( jasmine)وجرّة (jar)وكحل(kohl). اما lemon فمستوحاة من  ليمونة حامضة لكل مين عم بيحاول يشوف حالو على لغتنا.

===========