الاحداث- كتبت جوزفين حبشي

-شو حبيبي؟ طمّني؟ اتوفقت؟ قديش جبت؟
-١٠ مطوق و٢٠ سمّن و٣٠ فرّي
-شو؟؟؟
-حبيبتي انا كنت بالبنك، مش بالصيد.
-ما اسألك. قديش عطيوك؟
- ولا دولار، ولا حتى فرنك مقدوح، قال تخطيت المسموح الي بالشهر، واكلتا بهدلة لأني كتير بعزيق.
- شو؟؟ ما قلتلن انو ابنك ساخن وعم يسعل وصدرو عم بيخرّ،  وضروري تعملو فحص دم  وممكن تفوتو عالمستشفى، والمستشفى بطّلت تقبل مرضى الضمان، ومجبورين ندفع كاش؟
- قلتلن حبيبتي،  قلتلن
- وشو قالولك؟
- قالولي ادهنلو صدرو  زيت من مار شربل وقديسة رفقة،وغطيه منيح .
- الله ومار شربل وقديسة رفقة لا يوفقوهم. طيب مرقت عالصيدلية وجبتلو  دوا سعلة وانتيبيوتيك؟
- مرقت حبيبتي، مرقت
- وينو الدوا؟
- مقطوع
- قطيعة اللي تقطعن شو كذابين. ما تقلي سكتّلن؟
- ابدا ، ما سكتّلن ابدا. بهدلتن وقلتلن: تفو عليكن 3 مرات باليوم، قبل الأكل وبعد الأكل ولمدة اسبوع.
- عسيرة الاكل، وين الدجاجة؟ بدنا نعملو صحن شوربة للصبي
- احترمي حالك حبيبتي، صار اسما لايدي دجاجة . اصلا لو اتصلنا ب لايدي غاغا  شخصيا وطلبنا منها تجي من نيويورك عبيروت فيرست كلاس، لتعمل للصبي show-rba ، كنا اكيد دفعنا ارخص من سعر دجاجة لنعمل صحن شوربة.
- حلو كتير. شو بدو ياكل الصبي هلأ؟
- صرماية عتيقة
- تفو عليك  3 مرات باليوم  قبل الشوربة وبعد الشوربة، ولمدة سنة. هيدا ابنك يا بلا اخلاق.
- حبيبتي، شو وقفت عالصبي؟ كلنا يعني كلنا اكلينا بالصرماية العتيقة، ومن ساواك بنفسه ما ظلمك. شو متوقعة مني طعميه؟ صرماية جديدة؟ انسي، سعرا اغلى 3 مرات من معاشي.