عيد "المعلّم كوم" والعصا تعلّم على جنابنا
الاحداث - كتبت جوزفين حبشي
بفضل كورونا،التعليم صارعن بعد، وعيد الاستاذ صار عيد "المعلم. كوم".
وقمّ لل"معلم. كوم" وفيه التبجيلا، وانا حابة بجّل وهنّي بعض معالمنا اللبنانية:
-اولا، مراسلي بعض التلفزيونات اللي عاملين اساتذة على الثوار، وبيسمعولهم ذات الدرس من سنة لهلأ" شو نازلين تقولوا"، وبيفحصوهم على طرق النفس بالتاريخ والفلسفة وتحليل النص.
-ثانيا، بيتاغور العرب وخوارزمي لبنان
اللي ما حدا غيرو قدر يعلّمنا ويحفّظنا المعادلة الحسابية الشهيرة (a+b)
-ثالثا، ينعاد على استاذ التاريخ الحديث "روز يه" اللي صححلنا معلوماتنا البسكوتية، واثبتلنا انو الصيت لماري انطوانيت والفعل لماري روز دو اشرفيه.
-رابعا نحنا ممنونينو لاستاذ التاريخ الحربي لأنو ضوّالنا (رغم انقطاع الكهربا) على حقيقة ما حدا ابدا بيعرفا: قنابل هيروشيما الذرية انزتت على الاكترية المسيحيية باليابان. امان ربي امان. والله يبارك بال...علم.
-اما حسن كامل الصباح العهد الحديث واديسون لبنان، فكاملة معو ، مش بس اخترع الكهربا المطفية، لا بل هو مرجعية بالاقتصاد، وعلّم دول العالم كيف بيديرو بلدانن من دون ميزانية. شو بيلبقلو أغنية: انت معلم ومنك نتعلم
ليستة المعايدات طوييييلة كتير لكل المعلمين فينا بلبنان،
ويا ريت العصا بتعلّم على جنابنا نحنا اللبنانيي، لانو ما عم نفهم الدرس، وبعدنا منسقط عند كل امتحان... مش الحق عالاستاذ، الحق على ابنك يا ثريا.