الاحداث- جوزفين حبشي
مش عم تتقطّع معي كيف عم تتهموا دولتنا بالديكتاتورية والقمعية. 
عن جد اتهاماتكن ما بتقطع. دولتنا ما بتمنعنا عن شي ابدا، ما عدا شي واحد فقط لا غير: ممنوع قطع الطرقات. وكل شي تاني مسموح. مسموح قطع الاعناق ، ومقبول قطع الارزاق والاشغال والاعمال ، واللي مش مرتاح ، دولتنا ما بتمنعو يفلّ، قطعتلو ورقة من زمان.
ايضا وايضا مسموح قطع لسانات المفتنين والمعترضين على مثالية دولتنا، ومسموح سوق القطع يلعب قد ما بدو بالدولار، ليل نهار.
واكيد ما في احسن من انو تنقطع الكهربا،  والمواد الغذائية،  ورفوف السوبرماركت تصوّفر ، ودكاكين اللحامين تغنّي "زوروني كل سنة مرة "، وليش ما بتاكلوا قاطع، احسن للصحة.
وعلى سيرة الصحة، دولتنا مش مانعة ابدا تقطيع لقاحات لكل حدا مقطّع موصل بيخصا وبيهما امرو .اما المقطوع من شجرة المحسوبيات والمحاصصات ، فمسموح ينطر دورو عالمنصة، اذا مش اليوم، بكرا، واذا مش بكرا، بعد بكرا. القطيعة تقطعكن قطع، شو صاير ، الاعمار بايد الله، وكلنا قاطعين بهالحياة، قطعة طريق.

========