الاحداث - كتبت جوزفين حبشي

١٢.١١.١٠
.. stoooop
انجأ الدولار وصل عال ١٠ بس ، وزق عقلكن، ونزلتو بكل عين وقحة  عالشارع، تشارعوا وتولعوا دواليب  ...
عن جد انكم شعب ناكر  للجميل.شغلتكن وعملتكن تنقوا على هالسلطة الفاضلة. ما بيعجبكن العجب، ولو ضوّولكن صبيعن العشرة. ١٠ الاف ليرة الدولار، وعشرة بعيون الحاسدين. 
فيني افهم ليش مزعوجين؟ 
انت يا شب الحلو، امّك اللي ما حدا ممكن يحبك قدّا، لما تدعيلك بالخير ، شو بتقلك؟ " روح يا ابني، انشالله ال١٠٠ دولار بايدك تصير مليون"... وصارت!!!!
وانت يا تلميذ يا كسلان بالحساب، اذا بدك تجمع ٣+ ٣، بتعدّ على صبيعك، بس هلأ ما عدت بحاجة لكالكولاتريس حتى تحسب قديش بيعمل الدولار عاللبناني. 
وانت ، ايه  انت يللي بتكره الجغرافيا وما خلقت بعهد الشيخ بشير، لهيك ما بحياتك حفظت قديش مساحة لبنان، هلأ ما بحياتك رح تنساها: ١٠ الاف الدولار و٤٥٢ فراطة. 
اما انتي يا مدام يلّي بتحبي الشوبينغ، صارت ال١٠٠ دولار  تشتريلك مليون شي، مش بس  ١٥٠ الف شي. فكيف بتقولي ما عادت تعملك شي؟
 يا جماعة العالم عم يحسدنا عوضعنا، والليرة بالف خير والدولار ب١٠ الاف خير .  فعلى شو عقلكن طار ودمكن فار؟ ببليز يا دولتنا امسحيها بهالدقن، هيدي فورة حسد وبتمرق. مقهورين من انجازاتك. لهيك قوليلن متل ما الليدي مادونا بتقول :
١٠ بعيون الحاسدين، قولو معايا، يفتح الله، إحنا حسّاد مش عايزين....