الاحداث- كتبت جوزفين حبشي

‎ أول ما سمعت إنو الرئيس الفرنسي السابق نيكولا ساركوزي حُكِم عليه بالسجن بتهمة فساد، شكرّت ربي ١٠٠ مرة   لأنو هيدي قصص الفساد "انبوسيبل" تصير عنا بلبنان. عن جد
‏ميرسي Dieu ، شي nous ، ما في  لا فساد ولا حبس ولا من يحبسون ولا من يحاسبون .
‎وللصراحة عصّبت شوي من ماكرون. انه مقضيها رايح جايه لعنا، حزّك مزّك، وعم يعطينا دروس بالاخلاق والشهامة والنزاهة . ولك كيف إلك عين تعمل استاذ على قياداتنا الشريفة العفيفة، ورئيسك السابق مشرّف على بيت خالتو؟ 
‎مش بس هيك، عاملّي حالو مُحِب للفن متل جوزا للست كارلا بروني، وزار فيروزتنا وعطاها وسام. دخيل عرضك يا ست فيروز، رديلو وسامو ومكاتيبو، ما بدنا منو شي، بكرا بيتهمونا انو قابضين رشوة... 
‎بس، يا فرحة ما تمّت. مدري كيف تذكرت هيك فجأة إنو فرنسا إمنا الحنونة، وصار الفار يلعب بعبّي. قولكم معقول تكون إمنا الحنونة مزعبرة بالحج نقولا، ويطلع ال بابا تبعولو لبناني؟؟؟ هالفكرة فأستني كتير ونزعتلي فرحتي عن بكرة ابيها. بس رجعت أخدت نَفَس وقلت " لا داعي للهلع"، ما إلنا غير وزير صحتنا يكشف الحقيقة .يرضى عليك معاليك، خود بسرعة قرار سيادي وفز لعندو على فرنسا وعملّو فحص DNA.

 دخيلك صيتنا ونزاهتنا بالدق، وانشالله قريبا منقص نحنا وياك... كاتو!!!

=====