الاحداث- كتبت جوزفين حبشي

بيتهمونا نحنا البنات انو منغيّر رأينا  الف مرة بالتكّة. ايه لأ ، غلطانين. بنت بيّ الكل مثلاً، مستحيل تغيّر رأيا. كلمتها كلمة، وعندا ثبات فظيع، واثبتتلنا بالدليل القاطع انو كل شي بينقال عن تغيير المواقف كل ما دق الكوز بالجرّة، هو مجرد شائعات مغرضة هدفها الاساءة للعهد. 
من اول ما انطلق عهد بيّا، وهي كل سنة و را سنة متمسّكة بموقف:  ما فينا نقيّيم العهد إلا بعد ما ينتهي. شايفين الثبات بالموقف؟ 
هالثبات ضرب الرقم القياسي بال ٢٠٢١ ، وبنت بيّ الكل صار بدا نقيّيم العهد بعد ما ينتهي بشي ١٥-٢٠ سنة!!!!
مش قليلة بنت بيّ الكل، مش بس عندا ثبات بالمواقف، عندا بعد نظر كمان. وهيك بتضمن إنو بعد مرور ١٥-٢٠ سنة على عهد بيّا، يا أمّا رح يسقط حكم التقييم حُكماً بسبب مرور الزمن، يا أمّا نحنا منكون... نسينا.
عم بسمع صوت فيروز عم يصرخ: إنسى؟ كيف؟ وال١٥ سنة؟
إيه عن جد كيف؟؟؟؟ إنو بيناتنا نسيانك يا عهد صعب اكيد، ومتل ما بيقول هاني شاكر:ما لوش غير حلّ وحيد، وهو التالي:
لازم وزير القرارات السيادية يطلع بقرار سيادي فوري بتلقيح كل الشعب اللبناني بلقاح ...النسيان.
الله يرحمك يا أم كلثوم شو كنت حبّ غنيّتك: أنساك، دا كلام؟ انساك يا سلام. اهو  دا اللي مش ممكن ابداً....