الاحداث- كتبت جوزفين حبشي

ما عم بفهم ليش حملة التهكم على النائب غسان عطالله لما صرّح وقال: خطاب البطريرك الراعي هو خطاب التيار  الوطني الحر منذ اعوام. 
ما أهضمنا لما نبلّش ننتقد هيك عالعمياني، وعلى أساس شو؟ إنو خطاب البطريرك كان موجه للتيار  تحديداً يلّي مغطي سلاح حزب الله . 
أنا شخصيا بدّي إعتذر منك مسيو عطالله عن كل اللي تنمّرو  عليك وعلى ذكاك. وبالصوت العالي رح إثني على تصريحك وقلّك  معك حق بكل كلمة قلتا: خطاب الراعي هو خطاب التيار  منذ أعوااااااام . أعوام ضوئية، مع إنو ضوّ الكهربا  ما بحياتو  إجا. 
حاصلو، إنتَ ما غلطت لما قلت منذ أعواااام، بس نحنا مفهوميتنا على قدّنا وما عرفنا نقرا صح، ونسينا إنو السياسة عند بعض السياسيين، بتعني تغيير المواقف والتحالفات حسب المصلحة، الوطنية طبعا، بكل لحظة. فكيف بالاحرى منذ أعواااااام؟

يا سلااااام، عن جد لما الله بدو يعطي  حدا متل عطالله ، ذكا ومفهومية ، ما بعود حدا منّا إلو حق يفتح تمّو !!!!!

===========