الاحداث- كتبت جوزفين حبشي

يا سلام على إنجاز منصة طلب إذن الضهرة من البيت خلال الاقفال العام.
إنجاز رائع ، ورغم هيك في كتير لبنانيي نكدين متل العادة، مش عاجبهن ومش معبّرينو حتى، انو شو البعد ناقص ؟ نطلب إذن اذا بدنا نعمل ..." احم احم"،"ايز  ميز" ؟؟؟؟هول هني عم يحكوا. أما أنا، فكتير مبسوطة بفكرة إنو اطلب آذن وانطر على أحرّ من الجمر الرد. يا "ايه اضهري"، يا "لأ، شرفي فوتي على اوضتك وادرسي وبلاهن هالحركات". 

عن جد هالمنصة رجعتني لفترة المراهقة والطعش، وقت كنت مجبورة اطلب إذن من أهلي لإضهر، وياما كذّبت عليهن، وتحججتلن إني رايحة ادرس عند صاحبتي، متل ما عم نتحجج اليوم بالصيدلية والمستشفى . 
أنا شخصيا مع هالمنصة، 
خصوصاً بزمن اللا"بوتوكس" واللا"فيلر" واللا"صبغة" واللا"كوافير"، لأنو ما حدا غيرا ممكن يرجعنا لسن المراهقة والشباب. كبروا عقلكن يا جماعة وخدوا إذن وارجعوا زغار وفرافير. 
يلا ، بالاذن منكم، انا فايتي.... ادرس، عندي تقديم بريفيه السنة!!!

==========